Por Galicia Confidencial | Verín | 21/01/2023 | Actualizada ás 10:00
Máis de 120 alumnos e alumnas de sexto de primaria e de primeiro de ESO pertencentes aos centros educativos de Verín, Amaro Refojo, María Inmaculada, Mercedarios e Princesa de España, participaron este venres 20 de xaneiro no Pleno Infantil, convocado no Concello de Verín para coñecer as inquedanzas e os desexos de implicación na vida pública dos veciños máis novos da vila.
Diego Lourenzo, tenente de alcalde do concello, explicou que esta sesión plenaria foi concibida en colaboración cos centros educativos da vila e coa finalidade de fomentar a concienciación da mocidade verinesa sobre temas de interese que afectan á vida pública.
POÑENDO O FOCO NA IGUALDADE
A igualdade foi o eixo temático sobre o que versou a sesión plenaria, que foi presidida polo tenente de alcalde e concelleiro de Mocidade, Diego Lourenzo e que contou coa presenza da concelleira de Cultura, Educación e Festexos, Emilia Somoza, e de Rosario Rodríguez, responsable da área de Recursos Humanos e Réxime Interior.
A importancia da concienciación da igualdade de xénero a través da educación, a declaración universal de dereitos humanos, a cooresponsabilidade e os diferentes erros de xénero presentes na sociedade ou a importancia de desmontar os roles e estereotipos foron algúns dos temas tratados nesta xornada educativa.
Segundo Lourenzo, "consideramos que é de vital importancia educar ao alumnado desde as idades máis temperás para conseguir eliminar os diferentes estereotipos sociais de xénero e fomentar entre eles valores de igualdade e respecto".
Aitor Chamín Oliveira, do centro educativo Amaro Refojo, foi elixido como alcalde infantil de Verín e ao remate da sesión o alumnado tivo a oportunidade de formularon preguntas e propostas sobre esta temáticas e os proxectos que se están a levar a cabo en Verín.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.