Activo un incendio forestal no Concello de Muíños e que afecta ao parque do Xurés
O lume entrou desde Portugal ao concello ourensán.
Por Galicia Confidencial | Ourense | 06/02/2023 | Actualizada ás 22:36
A Consellería do Medio Rural informa dun incendio forestal activo arestora no concello ourensán de Muíños, parroquia de Prado de Limia.
O lume orixinouse sobre as 18,00 h. en Portugal en dous focos diferentes e, posteriormente, entrou en Galicia. Segundo as primeiras estimacións, afecta unha superficie dunhas dúas hectáreas dentro do Parque Natural Baixa Limia-Serra do Xurés. No seu control traballan 2 axentes, 2 brigadas e 3 motobombas.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais poderá ser consultada na conta aberta de twitter: @incendios085.
