Éxito de participación no 'Concurso de Disfraces' de Arzúa

O pasado domingo, Arzúa celebrou por todo o alto o Concurso de Disfraces que fixo á xente desfrutar dun certame moi concurrido tanto de concursantes como de público. En total foron máis de 350 participantes, tanto de Arzúa como de outros concellos, que fixeron desfrutar a un Multiusos Terra do Queixo que completou o seu aforo.

O Concello de Arzúa repartiu máis de dous mil euros entre os gañadores do concurso, distribuidos en once premios. Na modalidade de comparsas resultaron gañadores “O carrusel Amarai”, que levaron o primeiro premio de 550 euros; “Os derradeiros moradores de Castro Curbín” da asociación ARIAR de Arzúa; e “Atocha´s cheese” desde o colexio Nosa Señora do Rosario de Arzúa acadaron o segundo e o terceiro posto, dotados de 300 e 150 euros, respectivamente.

No apartado de grupos de entre dous e oito compoñentes, “Historia de dúas Marías” de Teo alzouse co primeiro premio de 300 euros; “Mercamamis” de Curtis co segundo de 200 e “Funkos Peliqueiros” chegados dende Santiago co terceiro, dotado con 120 euros.

Os disfraces individuais tamén se premiaron con 80 e 120 euros no apartado infantil e adulto respectivamente. En infantil, no primeiro resultou gañador o disfraz “A princesa da estrela” vestido por Sabela de nove anos desde Santiago de Compostela e o segundo premio foi para “Fada do monte” de Noa tamén de nove anos e con familia en Arzúa. No que respecta aos disfraces adultos, os premiados foron “O león e o seu domador” de Sober e “Hulk Ragnarok” de Vilagarcía de Arousa que conseguiron o primeiro e segundo posto, respectivamente.

Un ano máis, o Concello incluíu no certame un premio especial denominado “Simpatía” que ía dirixido a un grupo ou comparsa local que non resultara premiado nas categorías anteriores. O grupo “Toy Story” fíxose con este galardón.

VALORACIÓNS

Falamos con Lidia Veiga, coñecida actriz galega de Arzúa que formaba parte do xurado, e coméntanos que foi todo un éxito, tanto de participación como de posta en escea polo simpático e entretido espectáculo que se montou, e todo moi ben guiado polo presentador, o humorista arzuán Xan Veiga. Lidia quixo subliñar tamén que merece un gran recoñecemento o Departamento de Cultura por darlle continuidade a este evento e Marcos Pampín, técnico de cultura, "por poñerlle tanto agarimo, amor e profesionalidade" a este concurso e a outras actividades que se organizan no concello.

Dende o Departamento de Cultura amosáronse moi satisfeitos polo alto nivel de participación e pola calidade dos disfraces e agradecidos pola implicación de todos os concursantes, así como a asistencia do público e o labor do xurado.

A programación do Entroido organizada polo Departamento de Cultura continúará esta vindeira fin de semana con animación musical, un obradiro familiar e o baile de disfraces na tarde do martes.