O PSdeG pide máis medios no Sergas polo "alarmante aumento" de problemas de saúde mental en menores

O PSdeG reclamou á Xunta que dote de máis medios ao Servizo Galego de Saúde (Sergas) para atender o "alarmante aumento" dos problemas de saúde mental en menores de idade e en persoas novas.

O deputado socialista e portavoz de asuntos sanitarios, Julio Torrado, presentou este mércores en rolda de prensa unha iniciativa que pide ao Goberno galego un maior compromiso con achegar solucións ante unha problemática que se viu "agravada" tras a pandemia.

Torrado sinalou que os datos de Save The Children revelan que os casos diagnosticados de problemas de saúde mental entre menores multiplicáronse por tres respecto das cifras previas á crise sanitaria.Tamén advertiu que o número de suicidios "duplicouse" desde 2020 e que é xa a segunda causa de morte nas persoas entre 15 e 30 anos.

"DÉFICIT" DE PROFESIONAIS EN GALICIA

Por este motivo, o deputado socialista ve necesario que a Xunta debe aumentar os recursos dado "o déficit claro" de profesionais deste ámbito en Galicia, comunidade "á cabeza" en número de casos de problemas de saúde mental pero con "un dos peores cocientes" do Estado en persoal por habitante.

Por iso, a iniciativa dos socialistas propón aumentar "o volume" dos recursos humanos do Sergas para saúde mental, a convocatoria de prazas de formación "especializada" e a posta en marcha de unidades de atención "en cada unha" das áreas sanitarias galegas, así como a creación dun grupo de traballo sobre suicidios en idades infanto-xuvenís.

O PP ACÚSAO DE "FRIVOLIZAR"

O PP acusou ao PSdeG de "frivolizar" coa saúde mental tras presentar unha iniciativa que demanda cuestións que, segundo os populares, xa están contempladas nun plan impulsado polo Goberno galego, como a creación de hospitais de día infanto-xuvenís no sete áreas sanitarias galegas.

O viceportavoz do Grupo Popular na Cámara galega, Alberto Pazos, respondeu así ás demandas do PSOE. Nun comunicado, o popular cualificou "desvergoña" que os socialistas demanden máis profesionais para esta área cando "votaron en contra da lei que vai permitir a incorporación cunha praza estable a 173 profesionais da saúde mental á sanidade pública galega".

Así mesmo, Pazos ve "unha frivolidade" que pidan unha unidade de atención infanto-xuvenil, posto que o Plan de Saúde mental aprobado en 2020 "xa prevé a creación de hospitais de día nas sete áreas sanitarias, dos cales xa están a funcionar neste momento os de Vigo, Santiago, Ourense, Lugo e Ferrol".