Por E.P. | Galicia | 09/03/2023 | Actualizada ás 16:48
A Xunta de Galicia elevou ao Goberno central un total de 33 alegacións ao anteproxecto de Lei de Ensinos Artísticos. Entre as modificacións que propón, están as que piden unha "equiparación real" entre as titulacións superiores e as universitarias.
O conselleiro de Cultura, Educación, FP e Universidades, Román Rodríguez, participou este xoves na Conferencia Sectorial de Educación, con representantes do Ministerio, ante os que detallou esa trintena de propostas.
A principal proposta da Xunta é que a norma remarque "de modo explícito" que os estudantes de ensinos artísticos superiores teñan "exactamente a mesma consideración que os universitarios" en cuestións como o acceso ás axudas, á cultura, á promoción profesional, á mobilidade e ás prácticas remuneradas, entre outros aspectos.
E é que, segundo explicou o conselleiro de Educación, "moitas convocatorias de axudas van dirixidas só a universitarios e obvian a existencia dos de artísticas superiores simplemente por descoñecemento".
Outra das alegacións do Goberno galego pasa por demandar a creación dun rexistro único de centros e titulacións, que "blindará aos estudantes no marco europeo" á hora de recoñecer e homologar títulos.
"UN MODELO DE ÉXITO" EN GALICIA
Por outra banda, a Xunta é contraria á proposta de diferenciar entre centros que imparten especialidades de ensinos artísticos profesionais, por unha banda, e superiores, por outra.
En Galicia, segundo reivindicou Román Rodríguez, as instalacións que ofertan ambas son "un modelo de éxito" polas sinerxías que xeran. Tamén apuntou que a súa segregación podería levar "importantes problemas loxísticos" para a dispoñibilidade de novos edificios e profesorado.
"UNHA MEMORIA ECONÓMICA"
De igual modo, o representante da Xunta reclamou que a nova lei "vaia acompañada dunha memoria económica que resulta absolutamente imprescindible" para que as autonomías poidan asumir o "incremento de gasto" que van supor as obrigacións que levará a súa aplicación.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.