Deseñan un sistema personalizado de dosificación para persoas maiores "polimedicadas"
Entre o 20 e o 50 por cento dos pacientes non toman correctamente a súa medicación
Por E.P. | Galicia | 11/03/2023 | Actualizada ás 13:27
O conselleiro de Sanidade, Julio García Comesaña, avanzou este sábado que Xunta e colexios de farmacéuticos colaboran para proporcionar sistemas personalizados de dosificación ás persoas maiores polimedicadas.
Na súa intervención, Comesaña subliñou que a falta de adherencia terapéutica é un dos "retos a abordar" polo sistema sanitario público galego, xa que entre o 20 e o 50 por cento dos pacientes non toma correctamente a súa medicación.
Comesaña puxo en valor a estreita colaboración entre representantes do Sergas e os colexios farmacéuticos no desenvolvemento deste sistema personalizado, que se orienta aos pacientes con maior risco de problemas de adherencia.
PARA MAIORES DE 74 ANOS
Un sistema que, segundo Comesaña, "oriéntase aos maiores de 74 anos e máis de 13 medicamentos tomados de forma crónica" e prioriza factores de risco sociais como vivir só ou non ter unha rede de apoio sociofamiliar adecuada".
No programa, que xorde nun contexto de desafío que representan as enfermidades crónicas, xoga un papel fundamental o farmacéutico comunitario, coa captación e o seguimento dos pacientes, así como na preparación e entrega dos sistemas personalizados de dosificación.
