Unha curta de estudantes pontevedreses, na programación do Festival de Cannes

Unha curta dun grupo de estudantes pontevedreses formará parte da programación do Festival de Cannes, tras ser un dos traballos seleccionados polo Instituto da Cinematografía e das Artes Audiovisuais do Ministerio de Cultura e Deporte para o programa '2cool4school', que reúne obras realizadas por estudiantado español.

Titulado 'Cando o tempo acabe', está dirixido por Miguel Gómez Abad e naceu como traballo de fin de grao (TFG) de varios estudantes da Facultade de Comunicación da Universidade de Vigo.

A súa selección para esta iniciativa do Executivo central permitiu, en primeiro lugar, que sexa unha das obras que integran a programación do Málaga Short Corner, unha das actividades incluídas no Spanish Screening Content no marco do Festival de Málaga. Así mesmo, en maio tamén estará no Short Filme Corner do Festival de Cannes.

"Non é unha sección oficial nin competitiva, senón algo complementario ás seccións principais, pero para nós supón un bo golpe de visibilidade", indicou Gómez Abad, segundo recolle o Diario da Universidade de Vigo.

Tal como dixo, o proxecto arrincou en 2020 e inicialmente ía ser o seu traballo de fin de grao. Con todo, a pandemia obrigou a atrasar a rodaxe, de tal forma que o TFG que defendeu en 2021 foi un guión e a produción dun curto, que non se rodaría ata marzo de 2022.

Nel, úsase a ciencia ficción para falar de problemas actuais, "como é neste caso o cambio climático", ou de temas máis introspectivos como a soidade. Así, o seu protagonista, unha brillante científica, trata de resolver un erro do pasado "custe o que custe" nun mundo "devorado por unha crise climática".