O persoal da recollida do lixo de Padrón inicia unha folga indefinida o 27 de marzo
Os traballadores levan sen incremento salarial desde 2015 e sen negociación do convenio.
Por Europa Press / Redacción | Padrón | 16/03/2023 | Actualizada ás 17:21
O persoal do servizo de recollida de lixo e do punto limpo do Concello de Padrón iniciará o día 27 unha folga indefinida para reclamar que se retomen as negociacións do convenio colectivo, segundo informaron nesta xornada.
E é que, segundo explicou a Europa Press Roberto Alonso, secretario comarcal de CIG-Servizos, os traballadores levan sen incremento salarial desde 2015 e sen negociación do convenio. "Pero con máis sobrecarga de traballo", apostilou.
Antes, engadiu, a renovación do convenio era de forma mensual pero coa entrada da nova empresa o pasado mes de xullo, FCC Medio Ambiente, iniciáronse contactos sen que se chegase a ningún acordo.
Ademais de denunciar que non se lles facilitase por parte do concello un local social para informar dos motivos da folga, reprochou ao goberno local que non atendese a súa petición de mediación. "Non recibimos sequera resposta", manifestou.
En particular, incidiu no aumento da carga de traballo ao incrementarse o número de colectores, pero asegurou que os traballos do servizo están a cargo de menos persoas, seis, tras o despedimento dun traballador.
