Por Europa Press / Redacción | SANTIAGO DE COMPOSTELA | 18/03/2023 | Actualizada ás 14:00
Representantes do sector da construción e dos arquitectos en Galicia aseguran estar "preparados" ante o que ven unha "tendencia imparable", en relación ao reto de que todos os edificios de nova construción sexan de "cero emisións" para 2028.
O pleno do Parlamento Europeo adoptou esta semana un proxecto para que todos os edificios de nova construción estean equipados con tecnoloxías solares para 2028, cando sexa tecnicamente adecuado e economicamente factible, mentres que os edificios residenciais en proceso de renovación importante teñen ata 2032.
En declaracións a Europa Press, o xerente do consello territorial de Galicia da Fundación Laboral da Construción, Fernando García Novo, explica que este proxecto da Eurocámara "responde a unha tendencia imparable: a de mellorar a eficiencia enerxética das vivendas".
A fundación laboral da construción, na que se uniron a Confederación Nacional da Construción, CC.OO. do Hábitat e a Federación de Industria, Construción e Agro de UGT, preséntase como clave na formación dos profesionais.
Pola súa banda, a decana do Colexio de Arquitectos de Galicia, Elena Ampudia, destaca que os seus colegas están "preparados para o reto" e a comunidade "ben situada porque se está facendo un gran esforzo para que as axudas" para mellorar a eficiencia enerxética dos edificios cheguen ao maior número de beneficiarios.
FALTA DE PROFESIONAIS
Desde a industria da construción, pola súa banda, García Novo coincide en que "se está traballando desde hai moito tempo para estar preparados ante esta nova realidade, aínda que preocupa a falta de profesionais, xa que este tipo de edificios requiren unha man de obra altamente cualificada".
O sector entende que "a mellor vía para loitar contra o cambio climático e a crise enerxética é diminuíndo a demanda porque, aínda que hai enerxías renovables moito máis limpas que os combustibles fósiles, a enerxía máis limpa é a que non se usa", subliña o xerente.
DIRECTIVA
A directiva de 2012 relativa á eficiencia enerxética sinala que os edificios representan o 40% do consumo de enerxía final da Unión Europea. Nesta directiva, a UE xa se marcaba a meta de conseguir un aforro do 20% no consumo de enerxía, apunta o xerente da fundación laboral.
"Os cambios normativos reflicten esta tendencia desde hai moitos anos, como o novo Código Técnico de Edificación, no que se modifican á alza os valores mínimos de esixencia enerxética para encamiñarnos cara a edificacións con consumo enerxético case nulo", incide.
A este código técnico alude tamén a portavoz dos arquitectos galegos: "Vén desde 2006 adaptándose ás normativas europeas e desde hai anos a tendencia é a proxectar edificios de consumo case nulo", sinala.
Esta semana, a posición da Eurocámara foi apoiada por 343 votos a favor, 216 en contra e 78 abstencións, mentres que os eurodeputados deberán iniciar agora negociacións co Consello para acordar a forma final do proxecto de lei.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.