Galicia reclama ao Goberno dous novos maxistrados penais
Súmanse ás demandas dun xulgado de violencia machista en Santiago.
Por E.P. | SANTIAGO DE COMPOSTELA | 21/03/2023 | Actualizada ás 11:27
Galicia reclama este ano ao Goberno a creación de dous postos de maxistrados da sección penal para as audiencias provinciais da Coruña e Pontevedra, así como a xa anunciada petición para configurar un xulgado de violencia sobre a muller de carácter "exclusivo e excluínte" para o partido xudicial de Santiago que dea cobertura aos de Ribeira, Padrón e Negreira.
A proposta da Comunidade galega ao Ministerio de Xustiza para a creación de novas unidades xudiciais de face a 2023 foi acordada este martes nunha reunión da Comisión Mixta, mantida por videoconferencia entre o vicepresidente segundo e responsable de Xustiza no Goberno galego, Diego Calvo, e o presidente do Tribunal Superior de Xustiza de Galicia (TSXG), José María Gómez e Díaz-Castroverde.
Así pois, o Executivo autonómico e o Alto Tribunal galego piden a Xustiza que dea prioridade ao xulgado de violencia sobre a muller en Santiago, que se sumaría aos que xa funcionan na Coruña e Vigo e que se inclúe na folla de ruta de estender ao resto de cidades galegas este tipo de tribunais durante os próximos dous anos.
Ademais, a proposta de Galicia tamén inclúe a creación de dous postos de maxistrados penais da sección penintenciaria para as audiencias da Coruña e Pontevedra, unha petición que, como lembrou a Xunta nun comunicado, xa foi efectuada o pasado ano.
A solicitude galega para este ano complétase, por orde das cargas de traballo existentes na actualidade en Galicia, coa reclamación dun xulgado de Primeira Instancia na Coruña e outro en Ourense, un contencioso en Santiago, un social en Ferrol e outros de primeira instancia en Vilagarcía, Viveiro, Ribeira e Carballo.
O Goberno autonómico subliñou o seu compromiso a "pór en marcha no menor tempo posible, como hai cada ano" as novas unidades xudiciais que decida outorgar o Consello Xeral do Poder Xudicial.
