Unanimidade para reclamar ao Goberno a construción simultánea do viaduto do Castro en ambos os sentidos
Piden que proceda con "toda a celeridade posible" a dar unha solución ao problema
Por E.P. | SANTIAGO DE COMPOSTELA | 21/03/2023 | Actualizada ás 20:11
Os grupos da Cámara galega coincidiron ao pedir ao Goberno do Estado que proceda con "toda a celeridade posible" a dar unha solución ao problema xerado tras o colapso do viaduto de O Castro, na Autovía do Noroeste, e inicie a reconstrución da infraestrutura en ambos os sentidos de forma simultánea, co fin de reestablecer canto antes a circulación por este punto da A-6
A iniciativa defendida este martes polo parlamentario popular José Manuel Balseiro no pleno tamén reclama ao Executivo estatal que "actúe con transparencia e ofreza información continua para manter ao día aos galegos, aos concellos afectados e á Administración autonómica sobre as novidades e avances que se vaian producindo en relación aos prazos e previsión sobre a reconstrución do viaduto".
Na súa intervención, Balseiro asegurou que hai "múltiples motivos" polos que esta infraestrutura continua de plena actualidade e que "todos eles teñen ao Goberno de triste protagonista" de "un desprezo e desatención continuada" ás demandas de Galicia.
Ademais, tras censurar que o Ministerio de Transportes "non ofreza información nin actúe coa transparencia debida", sostivo que o "desprezo de Sánchez a Galicia" tamén ten que ver coa forma na que se programa a reconstrución, ao renunciar á vía de emerxencia e provocar un "atraso inaceptable nos prazos".
"Votando a favor desta iniciativa votarán a favor de que se acometa a reconstrución simultánea dos dous viadutos ao mesmo tempo, que se faga polo procedemento de emerxencia e que se axilicen os prazos", dixo Balseiro, que lamentou a falta de vontade do Goberno. "Porque en todas as infraestruturas viarias de relevancia os viadutos paralelos execútanse ao mesmo tempo", incidiu para emprazar á oposición a "deixar de mirarse o embigo" e apoiar a iniciativa do PPdeG.
APOIO DE BNG E PSDEG
Na sesión, o deputado do BNG Luís Bará, que avanzou o voto a favor da súa formación, coincidiu ao sinalar que a xestión desta crise por parte do Goberno central "deixa moito que desexar" ao ser "manifestamente deficiente e moi mellorable".
"Sendo conscientes de que é un asunto que ten a súa complexidade... A reacción foi lenta, non estivo á altura e as alternativas de desvíos foron unha auténtica chapuza con continuos parches e improvisacións", dixo Bará, que tamén reclamou prazos "claros e cribles", así como unha mellor información e coordinación co Goberno galego.
Por último, tamén cargou contra o PPdeG. "Teñen vostedes unha dobre moral política. Xa nos gustaría velos con esa rabia cando pasou o que pasou coa AP-9. Entón vostedes, chitón. Porque a vostedes non lle interesa Galicia, vostedes o que defenden son os intereses do PP de Madrid".
Ademais, o parlamentario do Bloque expuxo unha emenda para a creación dunha comisión de seguimento e outra de investigación sobre as causas do colapso da infraestrutura. Con todo, previsiblemetne esta non sairá adiante ao avanzar o seu rexeitamento o grupo maioritario.
Pola súa banda, a socialista Patricia Otero tamén avanzou o apoio dos socialistas galegos a esta petición e lembrou que, desde un primeiro momento, a súa formación apoiou as iniciativas levadas a debate na Cámara galega polo PP sobre este asunto ao coincidir na necesidade de investigar as causas do derrube.
Con todo, lembrou ao Partido Popular que eran eles os que estaban no Goberno cando se produciron as obras e instou aos populares galegos a esixir a mesma celeridade a todas as administracións na reparación de infraestruturas en referencia á estrada autonómica de Folgoso do Courel, que permanece cortada desde o pasado ano.
