Por E.P. | Pontevedra | 29/03/2023 | Actualizada ás 16:16
A Xunta levará a cabo este xoves, día 30 de marzo, a licitación do futuro Edificio de servizos integrados no medio rural de Lalín, que suporá un investimento de 3,7 millóns ata o 2025. O anuncio foi trasladado este mércores polo conselleiro do Medio Rural, José González, nun acto no que estivo acompañado polo alcalde de Lalín, José Crespo.
Neste edifico, sinalou, integraranse diferentes servizos da Xunta que permitirán prestar atención á cidadanía dunha forma máis eficiente e, ao mesmo tempo, mellorarán as condicións de traballo, posibilitando gañar na eficiencia da utilización dos recursos públicos.
Así, na planta baixa haberá servizos administrativos como a Oficina Rural, unha sala de reunións e videoconferencias, aseos e cuartos auxiliares. Na primeira planta estarán situados os servizos agrarios e veterinarios da Oficina Rural, así como da área comarcal de Lalín, unha sala de reunións e o arquivo.
A oficina de infraestruturas agrarias, xunto cos servizos forestais da Dirección Xeral de Planificación e Ordenación Forestal e da Dirección Xeral de Defensa do Monte estarán situadas na segunda planta. Tamén se atopará alí a sala de control do Distrito forestal XVI Deza-Tabeirós e unha sala de reunións. A maiores, o edificio poderá albergar outras unidades distintas da Consellería do Medio Rural.
OUTROS INVESTIMENTOS NO CONCELLO
Por outra banda, o conselleiro puxo en valor os case 8,8 millóns do seu departamento en diferentes actuacións no municipio de Lalín para mellorar as súas infraestruturas e os servizos que se prestan á cidadanía.
Así, aos 3,7 millóns que se investirán no novo edificio de servizos integrados súmanse 3,8 millóns para crear a nova base de helicópteros para a loita contra os incendios forestais en Lalín. Nesta partida tamén se inclúen as melloras a realizar na base de San Xoán de Río, na provincia de Ourense.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.