Os buses escolares, entre os servizos mínimos da folga no transporte de viaxeiros
Tamén se atopa o transporte de usuarios a centros socioasistenciais para a atención diúrna
Por Europa Press / Redacción | Galicia | 30/03/2023 | Actualizada ás 11:12
O Diario Oficial de Galicia (DOG) publicou este xoves os servizos mínimos establecidos para a folga no transporte de viaxeiros en Galicia, que levará a cabo este venres, día 31 de marzo. Circunstancias como garantir os dereitos vinculados coa mobilidade, co acceso á educación, ao traballo ou á protección das persoas usuarias de centros de día de atención a maiores provocaron o establecemento destes servizos mínimos.
A folga, convocada pola Confederación Intersindical Galega (CIG), Comisións Obreiras (CC.OO.) e a Unión General de Traballadores (UGT), afecta de forma xeral ao ámbito territorial das concesións do servizo público de transporte de viaxeiros por estrada en Galicia.
Con todo, marcáronse unha serie de servizos mínimos relacionados con servizos públicos de transporte regular de uso xeral ou servizos de transporte especial de escolares aos centros de estudo cuxo traxecto sexa superior aos 4 quilómetros.
Tamén se establece como servizos mínimos os servizos de uso especial para o transporte de traballadores en todas as expedicións anteriores ás 09,00 horas e posteriores ás 18,00 horas. Os transportes de usuarios a centros socioasistenciais para a atención diúrna a persoas maiores son servizos mínimos entre as 08,00 horas e as 11,30 horas, para dar entrada aos mesmos, e entre as 17,00 e as 20,00 horas, para a súa saída.
