Pontón resalta o "proxecto ambicioso" do BNG para sacar "todo o potencial" que ten Galicia
A portavoz nacional do Bloque Nacionalista Galego está certa de que o seu partido terá un resultado "histórico" nas eleccións municipais.
Por Europa Press / Redacción | SANTIAGO DE COMPOSTELA | 30/03/2023 | Actualizada ás 19:31
A portavoz nacional do Bloque Nacionalista Galego, Ana Pontón, reivindicou en Ourense o "proxecto ambicioso" da súa formación para sacar "todo o potencial" que ten Galicia.
Pontón protagonizou este xoves o Foro A Rexión, organizado pola cabeceira ourensá, na que tamén interveu o aspirante nacionalista á alcaldía, Luís Seara, encargado de presentar a intervención da líder frontista. Alí, asegurou que cando mira Galicia ve "un gran país que foi capaz de saír adiante en circunstancias moi difíciles" e que sentenciou que "vai volver a facelo".
Pediu que se "confíe nas capacidades e en todo o potencial" que ten Galicia e que, segundo Pontón, o Bloque está en disposición de espremer a través do seu "proxecto ambicioso". Reforzar os servizos públicos con especial atención á sanidade apostando pola saúde mental e a atención aos maiores, activar a "produción" co foco posto en recuperar un rural "abandonado" e unha industria que "perde músculo", frear a "fuga continuada" de talento investigador ou apostar por unha tarifa eléctrica galega para "avanzar no autogoberno político e financeiro".
Ademais, tamén incidiu na importancia das infraestruturas, que ten en Ourense, para Pontón, un punto estratéxico que non pode limitarse a "conectar Madrid" senón que debe servir para "vertebrar" todo o territorio.
Por último, subliñou a necesidade de estreitar lazos con Portugal, loitar contra a eliminación das violencias machistas e a desigualdade entre homes e mulleres, así como reforzar o papel da lingua galega e a súa internacionalización coa posta en marcha do Instituto Rosalía de Castro.
"Estou convencida de que o Bloque Nacionalista Galego vai obter un resultado histórico nestas eleccións, con máis alcaldes e alcaldesas", manifestou Pontón quen tamén defendeu a Luís Seara como "a garantía" para cambiar o rumbo da cidade en Ourense, e resaltou o bo facer da súa formación nos concellos que goberna, tales como Allariz ou Pontevedra.
