Por Europa Press / Redacción | SANTIAGO DE COMPOSTELA | 31/03/2023 | Actualizada ás 13:03
A folga do sector do transporte de viaxeiros en autobús por estrada desenvólvese cun seguimento "masivo" nas catro provincias, segundo as tres organizacións sindicais que convocan o paro (CIG, UGT e CC.OO.).
En declaracións a Europa Press, os representantes de CIG, UGT e CC.OO. sitúan o dato de seguimento por enriba do 90% e aseguran que "roza" o 100% nalgúns casos. Pola súa banda, a Federación Galega de Transportes (Fegatramer), valora que "discorre con normalidade", aínda que nas cidades bloqueáronse as saídas, en particular as estacións e "non permitiron dar cumprimento nin aos servizos mínimos", en palabras do seu portavoz Carlos García Cumprido.
Os traballadores reclaman negociar os catro convenios e as táboas salariais, que, segundo apuntan, levan sen actualizar dous anos no caso da Coruña e Pontevedra e cinco no de Lugo e Ourense. Ademais, na cidade de Vigo, na que este venres empeza o fin de semana 'grande' da Reconquista, coincide coa folga da concesionaria do bus urbano, Vitrasa.
"NON Á PRECARIEDADE"
Neste escenario, os sindicatos subliñan que agora, pasada Semana Santa, a patronal deberá "sentar de verdade". "Estabamos a negociar o IPC para A Coruña e Lugo e a oferta era do 0,8%. Isto é imposible. E en Lugo e Ourense nin sequera había negociación", criticou, pola súa banda, o portavoz do sector en UGT-Galicia, Miguel Campos, na concentración convocada na estación de Santiago.
O responsable do sector da CIG na comarca de Vigo, Carlos Lamosa, sinalou que a xornada de folga é resultado da actitude dunha patronal "inmobilista", que mantén salarios base por debaixo dos 1.000 euros e que, para actualizar as nóminas, ofrece "un irrisorio +0,8%". "Ri dos traballadores", concluíu.
PARO INDEFINIDO
Mentres, Raúl Rodríguez, de CC.OO. Galicia, non descarta que, chegado o momento, o sector reedite un escenario como o vivido durante o ano 2017, cando o paro foi indefinido e o conflito prolongouse durante varias semanas.
"A administración responsable aquí é a Xunta, que ten que mover ficha", advirte Campos, despois de trasladar as desculpas polos "danos causados" aos usuarios, que este venres de comezo da Semana Santa atopáronse coa folga á primeira hora da mañá.
O tres organizacións convocantes apuntan a unha xornada "sen incidencias" e a un "éxito rotundo", aínda que Ourense rexistrou algunha incidencia como as rodas picadas de autobuses en Trives e petardos lanzados na capital da provincia.
VIAXEIROS AFECTADOS
A sensación nas estacións de autobús galegas entre os viaxeiros era de desconcerto, xa que moitos deles descoñecían a convocatoria de folga, especialmente aqueles usuarios procedentes de fóra da comunidade.
Aínda que houbo menos movemento nas terminais, nalgúns puntos, como a estación intermodal de Vigo, houbo momentos de fileiras ante os mostradores de información das compañías.
A folga tamén provocou un transvasamento de afluencia das estacións de autobús ás de ferrocarril, aínda que o estendido que está o uso dos abonos gratuítos para viaxeiros recorrentes por parte de Renfe fai que os trens teñan esgotadas as súas prazas desde hai días.
ALFONSO RUEDA
Respecto a isto, o presidente da Xunta de Galicia, Alfonso Rueda, chamou á "responsabilidade" dos folguistas e pediu que se cumpran os servizos mínimos establecidos para o paro no sector do transporte de viaxeiros deste venres.
Así o sinalou o mandatario autonómico ante os medios de comunicación tras inaugurar un tramo da senda peonil e ciclista que percorrerá toda a fachada do Porto de Vigo, desde As Avenidas ata Bouzas.
Rueda subliñou que se trata dunha folga legal e que é un dereito dos traballadores, polo que mostrou o seu respecto de todos aqueles que deciden seguila. Con todo, solicitou "responsabilidade" para que se cumpran os servizos mínimos.
SERVIZOS MÍNIMOS
O cumprimento dos servizos mínimos de autobuses dependentes da Consellería de Infraestruturas e Mobilidade situouse na contorna do 40% ata as 9,00 horas, segundo os datos da Xunta. En relación co seguimento da folga de transportes nos servizos de autobús dependentes da consellería, o departamento autonómico que dirixe Ethel Vázquez apunta que a porcentaxe de cumprimento dos servizos mínimos establecidos nos interurbanos e integrados competencia de Infraestruturas e Mobilidade ata as 9,00 horas "roldaba o 40%".
En concreto, refire que foi do 37,04% no autobús interurbano e do 41,51% no transporte escolar compartido (servizos integrados). Así as cousas, afirma respectar o dereito a folga pero advirte de que "hai unhas regras de xogo que hai que cumprir" e lamenta que a presenza de piquetes nas estacións "estea a impedir o cumprimento dos servizos mínimos e a prestación dos servizos por aqueles traballadores que non desexan facer folga, ademais da afección ao transporte de escolares".
LUGO, POR BAIXO DO 15%
En total, desde as 0,00 ata as 9,00 horas, a consellería apunta que había 2.443 servizos previstos (autobús interurbano), 1.778 integrados (transporte escolar compartido), e realizáronse 905 e 738, respectivamente, de aí porcentaxes de cumprimento do 37,04% e do 41,51%.
Por provincias, na Coruña, eran 854 os servizos previstos, 245 os prestados; 507 os integrados e 212 os prestados. De aí saen porcentaxes do 28,69% de cumprimento de servizos mínimos e 41,81% nos servizos integrados. En Pontevedra, os datos son os seguintes: 694 servizos previstos, 505 integrados, e fixéronse 381 e 281, respectivamente: o 54,9% e o 55% de cumprimento, respectivamente.
As cifras baixan na provincia de Lugo, con 463 servizos previstos, 415 integrados, e a realización de 65 e 48, respectivamente (14,04% e 11,57%, respectivamente). Mentres, sitúanse por encima do 50% en Ourense: 432 servizos previstos, 351 integrados e 214 e 197 feitos, respectivamente: o 49,54% e o 56,13%.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.