Detención dun empresario de Zas acusado de estafa en relación coa venda fraudulenta de vehículos

Cando o comprador quería devolver o vehículo, ao decatarse de que non podía transferilo ao seu nome ou canso da espera, o empresario devolvíalle só unha parte do diñeiro.

Por Europa Press / Redacción | A CORUÑA | 05/04/2023 | Actualizada ás 10:47

Comparte esta noticia

A Garda Civil detivo a un empresario de Zas como presunto autor dos delitos de estafa e falsidade documental, en relación coa venda fraudulenta de decenas de vehículos. Segundo informaron fontes da comandancia da Coruña, a investigación iniciouse cando este empresario presentou unha denuncia ante a Garda Civil manifestando que lle roubaron un coche no seu establecemento de compravenda de vehículos.

Os axentes comprobaron nese momento que a documentación presentada do coche supostamente roubado non se correspondía co titular que figuraba na base de datos, e que faleceu en 2020. Avanzadas as pescudas, a Garda civil constatou que o vehículo en cuestión fora vendido, desde o falecemento do seu titular, en máis dunha decena de ocasións.

O denunciante ofrecía o coche e, cando chegaba a un acordo económico para vendelo, cobraba aos compradores o custo da transferencia, sabendo que non podería facer ese trámite.

Cando o comprador quería devolver o vehículo, ao decatarse de que non podía transferilo ao seu nome ou canso da espera, o empresario devolvíalle só unha parte do diñeiro. Ademais, dáse a circunstancia de que varios compradores lle fixeron melloras ao vehículo, e devolvérono en mellor estado que cando o compraron, e o empresario non lles reintegraba a totalidade do diñeiro.

MANIPULACIÓN DO CONTAKILÓMETROS

Por outra banda, a Garda Civil tamén descubriu que o sospeitoso manipulara o cuentakilómetros de máis dunha decena de vehículos que vendera, para aumentar de forma fraudulenta o seu valor, chegando nalgúns casos o desfasamento a 200.000 quilómetros.

Así mesmo, realizara supostamente diversos contratos de compravenda a nome doutras persoas, utilizando os seus datos e fotocopias de DNI, sen coñecemento deses terceiros. Todo iso ocasionou numerosos problemas con diversas xestorías da provincia debido á incongruencia da documentación presentaba e a problemas coas transferencias de diñeiro.

Por todo isto, o Equipo Roca do posto de Carballo procedeu á detención deste empresario de Zas, ao que lle constan antecedentes por feitos similares, polos que xa foi condenado anteriormente. As dilixencias realizadas foron postas en coñecemento do xulgado de instrución 1 de Corcubión, e non se descarta que aparezan máis prexudicados, polo que as actuacións permanecen abertas.

Axentes da Garda Civil
Axentes da Garda Civil | Fonte: Ministerio do Interior.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta