Compostela Aberta reclama que o Concello "informe aos veciños" sobre a nova rede de transporte público

A portavoz municipal de Compostela Aberta e candidata á alcaldía, María Rozas, esixiu este mércores que o Goberno local "informe aos veciños" sobre as características da nova rede de transporte público.

Rozas subliñou que "é sorprendente" que o alcalde, Xosé Sánchez Bugallo, "siga sen aclarar cuestións como cales van ser as novas liñas de autobús ou cal será á súa frecuencia de circulación" e que isto "di moito sobre a súa maneira de entender a participación".

"Aínda que é urxente renovar a frota de autobuses, o importante é garantir un servizo público de calidade e iso require profundar nun novo modelo do que Bugallo non deu ningunha explicación en catro anos", sentenciou a portavoz de CA.

Por iso, Rozas esixiu ao alcalde que convoque outra reunión do Foro da Mobilidade "con carácter inmediato", co obxectivo de que aclare o mapa de rutas e a proposta de frecuencias.

Así mesmo, mostrouse dubidosa ante o compromiso do alcalde de iniciar a licitación este mes de abril e tela resolta en seis meses. Rozas apuntou que é un prazo que "o propio Bugallo sabe que é moi axustado para un contrato destas características".

MODELO DE COMPOSTELA ABERTA

Rozas sinalou que CA "deixou un traballo feito" no seu mandato "cunhas novas liñas consensuadas cos veciños" nas que "se apostaba por simplificar o mapa de rutas", pero "cubrindo un ámbito xeográfico maior que na actualidade". Así, detallou que "se prevía unha notable mellora en canto ás frecuencias".

Deste xeito, apuntou que "a día de hoxe nin sequera tense a seguridade de que se manteña este modelo" no novo prego que "quere licitar o Goberno antes das eleccións municipais".

María Rozas