Por Europa Press / Redacción | MADRID | 16/04/2023 | Actualizada ás 16:01
Máis de 414.500 estranxeiros residentes no Estado, dos que a cuarta parte son de nacionalidade romanesa, poderán votar nas eleccións municipais do próximo 28 de maio, segundo as cifras da Oficina do Censo Electoral que estes días están en proceso de consulta nos distintos concellos.
En concreto, trátase de 414.581 persoas pertencentes a países da Unión Europea ou de Estados cos que España ten asinados acordos de reciprocidade que permita aos nosos compatriotas votar nas súas eleccións locais. A eles súmanse outros 111 estranxeiros con dereito a votar nas eleccións ás asembleas de Ceuta e Melilla.
Todos estes cidadáns non só residen no noso país, senón que ademais expresaron en tempo e forma a súa vontade de votar nas municipais de maio, dentro do prazo que se habilitou e que acabou o pasado 30 de xaneiro.
No censo electoral de estranxeiros están representadas 39 nacionalidades, destacando o caso de Romanía, que copa a cuarta parte do total (113.492 electores). Detrás aparecen Italia (66.845 persoas) e Alemaña (41.630), e a máis distancia Reino Unido e Francia, con 36.543 e 36.310 electores, respectivamente. No lado contrario figuran Trinidad e Tobago (seis electores), Islandia (40) e Nova Zelandia (41).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.