Por Galicia Confidencial | Compostela | 20/04/2023 | Actualizada ás 14:43
O presidente da Xunta, Alfonso Rueda, amosouse satisfeito tras o acordo que chegaron a última hora do xoves o Sergas e representantes do CESM, o único sindicato que mantiña a folga deste colectivo. Un acordo que puxo fin, precisamente a esta protesta tras acordar as dúas partes incentivos económicos para estes profesionais. "É unha boa nova e está na folla de ruta que seguimos en sanidade para facer melloras de tipo material e tamén nas condicións de sanitarios, e subir as gardas", dixo Rueda.
Na rolda de prensa posterior ao Consello da Xunta, Rueda insistiu en que o seu executivo segue esa "folla de ruta" e "ten capacidade de mellorar e non quedar estancado". "Todo foi dentro da normalidade e agardamos que sirva para inaugurar unha nova época de diálogo e que os sanitarios saiban que se poden conseguir as cousas falando", dixo en alusión a folga que mantiveron durante nove días.
O presidente galego mantivo que a mellora nas retribucións destes profesionais supón tamén mellorar a calidade asistencial. E, polo tanto, descartou que os problemas na sanidade galega, principalmente na Atención Primaria, teñan que ver só coa falta de profesionais sanitarios. "Se melloramos a súa situación, mellorá a situación da sanidade en xeral. Non son cousas diferentes, senón simultaneas", dixo ao respecto.
Por outra banda, Rueda aclarou que nese acordo non se falou de eliminar a prohibición que aínda rixe en Galicia de que os médicos que simultaneen a sanidade pública coa privada non cobren o complemento específico. "Non houbo ningún acordo sobre isto. Falouse da licitación das gardas pero non elimanar ese complemento", dixo
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.