A Xunta estudará crear zonas de estacionamento vixiado para transportistas
O sector do transporte e o Goberno galego tamén compartiron a súa "preocupación" polo estado dalgunhas infraestruturas viarias, principalmente, a A-6 e a A-52.
Por E.P. | SANTIAGO DE COMPOSTELA | 24/04/2023 | Actualizada ás 19:01
A Xunta comprometeuse a colaborar co sector do transporte de mercadorías por estrada para a creación de zonas de estacionamento vixiado para transportistas, que, pola súa banda, trasladaron a súa preocupación polo estado dalgunhas das principais vías de comunicación, como a A-6 ou a A-52.
Estes dous foron os dous principais asuntos abordados na reunión do Comité Galego do Transporte celebrada este luns no edificio administrativo de San Caetano con presenza da conselleira de Infraestruturas e Mobilidade, Ethel Vázquez.
Nun receso do encontro, a titular de Mobilidade e o presidente do Consello Galego de Transporte e máximo resposnable de Fegatramer, Ramón Alonso, atenderon aos medios para manifestar a necesidade compartida entre Xunta e sector de avanzar na posta en marcha de áreas de descanso para transportistas que conten con servizos básicos e sistemas de videovixilancia.
Para a súa posta en marcha, a conselleira sinalou que Galicia podería acudir a unha liña de fondos europeos para solicitar financiamento. Ademais, a Administración autonómica tamén se comprometeu a "reforzar" a inspección ante a existencia de falsos autónomos e cooperativas que operan de forma fraudulenta.
INFRAESTRUTURAS
Doutra banda, sector e Goberno galego tamén compartiron a súa "preocupación" polo estado dalgunhas infraestruturas viarias, principalmente, a A-6 e a A-52 afectadas, respectivamente, polo colapso do viaduto do Castro --entre Pedrafita do Cebreiro e Veiga de Valcarce (León)-- e a deterioración do firme.
Respecto da primeira, Ethel Vázquez subliñou ante os medios que a reconstrución dos dous viadutos do Castro debe levar a cabo "o máis rápido posible" e "sobre todo" ha de realizarse de forma "simultánea", mentres que para a A-52 reclama unha "rehabilitación integral" do pavimento.
Outra das reclamacións do sector é que apliquen á autoestrada AP-53 que une Santiago e Lalín as bonificacións ás peaxes adoptadas noutras autoestradas similares. Por último, Ramón Alonso incidiu en que tamén debe avanzarse na finalización de infraestruturas prometidas como a autovía entre Santiago e Lugo e entre esta última e Ourense, "que tampouco se acaba nunca".
