Sindicatos e patronal do transporte volverán negociar este xoves unha solución para evitar a folga
Ambas as partes incidiron en que as particularidades dos servizos que se prestan en cada provincia complican a posibilidade de dar uniformidade aos convenios, especialmente na distribución das xornadas.
Por Europa Press / Redacción | Santiago | 03/05/2023 | Actualizada ás 11:24
Sindicatos e patronal do transporte de viaxeiros volverán atoparse na mañá do xoves para continuar coas negociacións para renovar os convenios colectivos provinciais e tratar así de esquivar a folga indefinida que CIG, CC.OO. e UGT iniciarán a partir do próximo 8 de maio se non hai pacto.
Despois de alcanzar un principio de acordo sobre a actualización das táboas salariais para compasalas ao IPC nunha reunión que permitiu a suspensión da folga de 48 horas convocada para o 25 e 26 de abril, parte social e empresarial regresaron á mesa na tarde do martes para retomar as conversacións.
Fontes sindicais e da patronal consultadas por Europa Press este mércores sinalaron que, canalizada a parte salarial, a negociación enfócase agora á distribución da xornada dos traballadores, que condiciona a programación dos servizos ao tratarse dun sector no que está fixado por lei os descansos dos condutores.
Ademais de pactar subidas salariais do 6,5% e do 5,7% en concepto do incremento do IPC polos dous últimos anos 2021 e 2022, da reunión de hai unha semana tamén saíu o compromiso a levar a cabo unha negociación de "mínimos" a nivel autonómico que dote de certa homogenización ao catro convenios provinciais.
Ambas as partes incidiron en que as particularidades dos servizos que se prestan en cada provincia complican a posibilidade de dar uniformidade aos convenios, especialmente na distribución das xornadas.
Así o apuntou o portavoz da Federación Galega de Transportes (Fegatramer), Carlos García Cumplido, que subliñou que a xornada dos traballadores do transporte de viaxeiros "non é como o dunha oficina" e deben terse en conta "moitas contigencias"; aínda que defendeu que a reclamación da patronal non está en reclamar un incremento das horas semanais.
Pola súa banda, o representante de CC.OO. nas negociacións, Raúl Rodríguez, advertiu dos problemas que introduciu nas conversacións os "novos elementos" expostos pola patronal no encontro do martes.
De face á reunión do xoves, o sindicalista expresou que deben concretarse "cuestións moi específicas" que deberán plasmarse sobre o papel cunha redacción "moi concreta", polo que se mostrou escéptico sobre a posibilidade de que o encontro, que espera que se prolongue durante horas, sirva para desencallar totalmente o conflito e evitar a folga convocada a partir do luns.
Pola súa banda, a patronal espera que a Xunta dea pasos cara á revisión dos prezos dos contratos para, do mesmo xeito que se pretende facer cos salarios dos traballadores, compásense ao escenario inflacionista que "disparou" os custos da prestación dos servizos licitados en 2019.
