Case a metade dos falecidos por sinistros de tráfico na provincia da Coruña non ían en coche
O ano pasado faleceron 42 persoas en accidentes de tráfico.
Por E.P. | SANTIAGO DE COMPOSTELA | 11/05/2023 | Actualizada ás 19:20
O 40% das persoas falecidas por sinistros de tráfico na provincia da Coruña son usuarias e usuarios vulnerables: peóns, ciclistas e motoristas, segundo datos da Subdelegación do Goberno con motivo da campaña de sensiblización que a Dirección Xeral de Tráfico e a Garda Civil están a levar a cabo durante esta semana nas estradas coruñesas.
A subdelegada do Goberno na Coruña, María Rivas, supervisou o desenvolvemento desta campaña que finaliza este domingo, 14 de maio. Fíxoo xunto á xefa provincial de Tráfico da Coruña, Vitoria Gómez e o capitán de Subsector de Tráfico, Miguel Soldán. Das 42 persoas falecidas en 2022 en accidentes de tráfico na Coruña, 17 eran usuarios vulnerables. Destes, 11 eran peóns, cinco motoristas e un, ciclista.
Segundo os datos achegados pola DXT todos os peóns falecidos eran maiores de 80 anos, circulaban por zona rectas con escasa visibilidade pero non necesariamente de noite e non levaban pezas reflectoras. No que respecta a este primeiro cuadrimestre do ano producíronse oito falecementos por accidentes de tráfico na provincia. Destes, tres foron por atropelo e un por accidente nun Quad.
