Morre Francisco Cacharro, histórico referente do sector das boinas no PPdeG
A capela ardente podería instalarse no salón de plenos da Deputación de Lugo, organismo qeu gobernou durante 23 anos. Xosé Manuel Barreiro destaca a súa importancia política.
Por Galicia Confidencial | Lugo | 08/03/2015 | Actualizada ás 17:00
Francisco Cacharro Pardo, un dos históricos políticos do PPdeG e referente do que se chamou o sector das boinas, faleceu este domingo aos 78 anos.
Cacharro Pardo levaba tempo afectado de problemas de saúde e estaba ingresado no hospital Polusa de Lugo desde hai varios día. Vivía, agora, apartado da política activa e deixara, ademais, a súa militancia no PPdeG.
Con todo, seguía mantendo moi boas relacións cun secotr deste partido. O portavoz do Grupo Popular no Senado e presidente do PP de Lugo, José Manuel Barreiro, lamentou "profundamente" o seu falecemento. "Levou ao partido ás máis altas cotas de representatividade na política lucense e galega", suliñou nun comunicado.
Tamén desde o PSdeG lamentaron o seu pasamento. De feito, a capela ardente do expresidente podería instalarse no salón de plenos do palacio provincial que agora gobernan socialistas e nacionalistas.
Cacharro presidiu a Deputación Provincial de Lugo desde o ano 1983 ao ano 2007, e tamén foi concelleiro no Concello lucense e senador. Xunto a Manuel Baltar, expresidente da Deputación de Ourense e do PP nesta provincia, Cacharro Pardo foi un dos grandes baróns do Partido Popular nos anos de Manuel Fraga á fronte do Goberno da Xunta.
A pesar de nacer en Xaén, onde o seu pai foi destinado á localidade de Guarromán para traballar como profesor, Francisco Cacharro desenvolveu a maior parte da súa vida en Lugo, onde foi inspector de educación antes de dedicarse de cheo á política.
O paso de Cacharro Pardo pola política galega non estivo exento de polémica. A finais do pasado mes de xaneiro, a Audiencia Provincial de Lugo ditou un auto polo que retiraba a acusación de Cacharro Pardo na denominada Operación Muralla.
A Fiscalía de Lugo decidiu retirar a acusación contra o expresidente da Deputación a unha semana de que tivese que comparecer na Audiencia Provincial para a celebración do xuízo.
