O historiador Miguel Taín ingresa na Academia Xacobea como membro de número
O catedrático de Historia foi definido como "un dos máis prolíficos investigadores sobre a relación entre Europa, o Camiño de Santiago, Compostela e as peregrinacións".
Por E.P. | SANTIAGO DE COMPOSTELA | 30/05/2023 | Actualizada ás 20:38
Miguel Taín, catedrático de Historia da arte na Facultade de Xeografía e Historia de Santiago, ingresou este martes na Academia Xacobea como membro de número.
O conselleiro de Cultura, Educación, FP e Universidades, Román Rodríguez, participou na sesión solemne celebrada no Colexio de Fonseca, na que destacou de Taín a "excelencia e precisión académica" das súas investigacións e traballos.
Rodríguez, segundo informa a Xunta, subliñou que a entrada do novo membro na Academia permite ampliar a visión sobre "a historia e o papel transcendental" do Xacobeo.
O conselleiro felicitou a Taín polo seu ingreso e celebrou que a entidade se nutra de profesionais como el, "un dos máis prolíficos investigadores sobre a relación entre Europa, o Camiño de Santiago, a cidade de Compostela e as súas peregrinacións".
