Preocupación ante o "deficiente" servizo de taxis en Santiago

A Asociación Hostalaría Compostela denuncia o "deficiente" servizo de taxis na capital galega que, segundo censura, "desde hai máis de dous anos causa numerosos prexuízos aos profesionais do sector".

Ante esta situación, "que se prolonga no tempo", o sector hostaleiro compostelán móstrase "moi preocupado" e "urxe unha solución", sobre todo ante a chegada da campaña de verán.

A Asociación sinalou que os seus asociados expresaron o seu malestar por esta situación. "Chamáronnos moitos compañeiros hostaleiros queixándose da falta de taxis, o que repercute negativamente nos nosos negocios", explicou Thor Rodríguez, presidente de Hostelaría Compostela.

Segundo destacou, os clientes, ante a imposibilidade de conseguir taxis, "están a anular reservas", algo que "sucede especialmente nos establecementos situados nos barrios periféricos", pero tamén "en moitos do centro do Centro histórico".

Así mesmo, indicou que as protestas dos clientes chegan tanto dos turistas como dos propios veciños de Santiago. Ademais, afirmou que a estas queixas tamén se suman os directores de hoteis, que "ven incapaces de conseguir servizo de taxi en moitos momentos do día" e recoñecen que nalgún caso "xa se está pensando nun servizo propio para poder solucionalo".

Nesta liña, os hostaleiros composteláns apuntan tamén que o problema de falta de taxis non se produce só coa coincidencia dalgún congreso ou evento. "Aí xa é unha tolemia", expoñen. Con todo, relatan que ocorre "todos os días e acotío" e "sófreno tamén os veciños".

O colectivo lembrou que a situación vén de lonxe. "Levamos dous anos denunciando esta situación e lonxe de solucionarse, parece que se agrava", afirma Thor Rodríguez, que espera que este asunto sexa un dos primeiros que aborde o novo Goberno local que tome posesión.

Transeúntes en Santiago de Compostela / César Argina - Europa Press. / Europa Press / Europa Press