Podemos Galicia quere pacto con Sumar: "acordar non é resignarse"

Pablo Iglesias ou Echenique apostaron xa por ir en solitario porque "xa é tarde".

Por Galicia Confidencial | A Coruña | 07/06/2023 | Actualizada ás 19:01

Comparte esta noticia

O coordinador de Podemos Galicia, Borja San Ramón, considerou que hai "tempo para chegar a un acordo" con Sumar, o partido que lidera a vicepresidenta segunda do Goberno, a galega Yolanda Díaz. Así, tamén aposta pola "unidade" e advertiu de que "acordar non é resignarse". "Hai que facer posible o necesario", avisa.

O coordinador de Podemos Galicia, Borja San Ramón, xunto ao deputado Antón Gómez-Reino e Verónica Hermida, tras ser elixidos en primarias da formación morada
O coordinador de Podemos Galicia, Borja San Ramón, xunto ao deputado Antón Gómez-Reino e Verónica Hermida, tras ser elixidos en primarias da formación morada | Fonte: Podemos

Estas reflexións de Borja San Ramón, en declaracións a Europa Press, seguen a mesma liña doutras voces territoriais do partido morado, como as pronunciadas desde Estremadura ou Navarra, que van na mesma liña do comunicado internamente, segundo as fontes consultadas, nos órganos de dirección que encabeza Ione Belarra.

Fronte ás voces do seu propio partido, especialmente as máis duras como as que nos últimos días expresou o cofundador de Podemos Pablo Iglesias, ou as de Pablo Echenique, que este mesmo mércores considerou que xa se chega tarde para un acordo, o cabeza visible de Podemos Galicia volveuse a mostrar partidario dun acordo e conveu que é factible nas horas que restan alcanzalo.

As experiencias previas en Galicia para pactos de confluencia nos que a propia Yolanda Díaz participou anticiparían un acordo nos compases finais dos tempos para rexistrar unha coalición, pero está por ver se se chega a última hora cun pacto sobre as persoas que integrarían as listas e que, segundo as voces que transcenderon, sería un dos principais escollos para pechar este pacto.

Habería que remontarse ás eleccións de 2016 en Galicia nas que un tuit de Pablo Iglesias desde Madrid irrompeu nas negociacións galegas con En Marea, ás que foran enviados Carolina Bescansa e Pablo Echenique. Daquela, Iglesias, a quen a propia Yolanda Díaz agradeceu entón a súa "xenerosidade", publicou nesa rede social que Podemos estaría con En Marea "sexa cal for" a fórmula de concorrer, xa que se estaba negociando contrarreloxo unha coalición ou ir só baixo o paraugas do partido instrumental.

"O OBXECTIVO, A DERROTA DE PP-VOX"

"O obxectivo é a derrota de PP e Voz; o camiño: a unidade", expresou Borja San Ramón, quen considerou que, por iso, "non hai lugar para a desesperanza". "É tempo de xenerosidade para sumar á esquerda plural do Estado", dixo.

O coordinador galego tamén lanza unha mensaxe interna, ao asegurar que "acordar non é resignarse", senón "apostar decididamente polo que teñen en común", que é "cambio políltico, defensa das liberdades e dereitos sociais das persoas e as nacións do Estado, transformación igualitaria da sociedade, avance dunha economía verde e construción dunha democracia real". Por iso, pon o acento en que "desde a pluralidade", hai que ser "conscientes da capacidade de transformación que achega" todo o que teñen "en común".

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta