Por Europa Press / Redacción | SANTIAGO DE COMPOSTELA | 13/06/2023 | Actualizada ás 18:57
A empresa Megasa Siderúrxica, situada no municipio de Narón, sufriu unha fuga dunha fonte radioactiva de Cesio-137 nun forno de arco eléctrico o pasado 8 de xuño, do cal informou o Consello de Seguridade Nuclear (CSN) con base no procedemento establecido. Esta situación obrigou á parada de produción de aceiro.
"De maneira inmediata, o organismo regulador levou a cabo as comprobacións pertinentes a través da súa rede automática de estacións de vixilancia radiológica, confirmando que o suceso non tivera repercusión para o medio ambiente posto que as medidas de radiación fóra da instalación presentaban valores habituais", informa o Consello de Seguridade Nuclear nun comunicado.
Segundo explica, o incidente foi identificado os pórticos de detección, ao producirse unha alarma de radioactividade durante a saída dun camión cargado con po de depuración. Ante este feito, o persoal da instalación detivo a produción de aceiro e a saída de produtos da instalación.
Tras informar ao CSN, Megasa iniciou as xestións necesarias para realizar unha caracterización radiológica da planta e comprobar o grao de afectación. Actualmente, a empresa ten parada a produción de aceiro e o sistema de extracción de po de fume, á vez que os materiais contaminados atópanse illados e acordoados no interior da instalación.
O CSN enviou o pasado luns un inspector á instalación para comprobar a situación e para poder autorizar a saída dos materiais que non resultaron contaminados. Tras a devandita revisión, o organismo vai requirir a Megasa que comprobe que "ningún traballador se viu afectado e que elabore un plan para a limpeza e descontaminación da instalación".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.