Aumenta a agresividade de tumores tiroideos por atrasos a raíz do covid
Así o acredita un estudo no que articiparon residentes do servizo de Anatomía Patolóxica do Hospital Clínico de Santiago
Por Europa Press / Redacción | SANTIAGO DE COMPOSTELA | 22/06/2023 | Actualizada ás 17:08
Médicos residentes do servizo de Anatomía Patolóxica do Hospital Clínico Universitario de Santiago de Compostela participou nun estudo internacional que foi publicado na revista 'The Lancet' no que analizaban un posible aumento na agresividade dos tumores tiroideos tras a pandemia do Covid-19.
Segundo informou o Sergas, o estudo, no que colaboraron os residentes patólogos do Hospital Universitario de Santiago, Kelly Vargas Osorio e Jaime Reuto Castelo, demostrou que a pandemia do Covid-19 é responsable dun aumento de tumores da glándula tiroides máis agresivos.
O estudo, recolleu a experiencia de máis de 87.000 pacientes de 157 hospitais e 59 países antes, durante e despois da pandemia --xaneiro do 2019 ata decembro de 2021--, que foron diagnosticados citolóxicamente con nódulos tiroideos indeterminados.
A experiencia recollida a nivel mundial, coa achega galega, demostrou que o atraso na intervención destes nódulos debido ás prioridades establecidas durante a pandemia deu lugar a tumores de maior tamaño e con maior número de metástasis no momento da cirurxía.
No estudo tamén colaborou o facultativo especialista do Hospital Clínico Universitario e titor dos médicos residentes, José Manuel Cameselle. Así, de acordo cos datos que recolleron a nivel mundial, os autores deste artigo concluíron que a "cirurxía por nódulos tiroideos indeterminados non debería ser atrasada en futuras situacións de pandemia", destacou.
