Por Galicia Confidencial | Compostela | 29/06/2023 | Actualizada ás 15:16
"Eu alegrome de non estar nesa tesitura en Galicia". A claridade da resposta de Alfonso Rueda cando se lle pregunta polos pactos con Vox amosa as distintas sensibilidades que hai no PP. O presidente galego sempre mantivo unha postura moi distante co partido de Santiago Abascal, a mesma que mantiña Feijóo cando era presidente galego e que, agora, mudou categóricamente.
Un cambio de 360º motivado pola necesidade de chegar á Presidencia do Goberno español xa que precisa, si ou si, dos votos da ultradereita. Un escenario que, en Galicia, polo momento, é impensable. Por iso, Rueda navega entre dúas augas e, aínda que presume de que na nosa terra Vox ten un concelleiro, tamén cambiou o discurso e agora non pecha as portas a falar cos de Abascal. Iso si, noutros sitios nos que non sexa Galicia.
Por iso, di entender as posturas dos que están e non están a favor de falar con Vox dentro do seu partido tal e como aconteceu coa líder do PP en Extremadura, María Guardiola, que nun primeiro momento pechou todas as portas a pactar coa ultradereita e, agora, acosada por outros dirixentes populares, principalmente, por Isabel Díaz Ayuso, en Madrid, tivo que dar marcha atrás e tentar buscar ese pacto.
Agora, o PP fai cambalaches políticos para explicar o que antes era inexplicable, o pacto con Vox. "Se outros pactan cos que apoian a terroristas o PP tamén poderá falar con quen sexa. E se ten que falar con Vox, pois tamén", xustificou Rueda na rolda de prensa posterior ao Consello da Xunta.
"Se entran ou non --nos executivos autonómicos co PP-- o que se trata é de conformar gobernos con eles ou sen eles, pero que sexan estables", dixo o presidente galego. Con todo, tamén dixo alegarse de "non estar nesa tesitura", na mesma que agora están os dirixentes populares en Baleares, Extremadura, Valencia ou Murcia.
LIÑAS POLÍTICAS
Vox está facendo valer o seu teorema político en moitos pactos, especialmente, no que ten que ver con violencia de xénero, os colectivos LGTBI ou o non respecto ao medio ambiente. Nalgúns destes acordos o PP acetou xa chamar "violencia intrafamiliar" á violencia de xénero ou poñer límites aos colectivos LGTBI.
Pero, a pesar desas evidencias, o presidente galego insiste en que hai "liñas vermellas" que non se poden cruzar. Hai unha semana dicía que a violencia de xénero é violencia de xénero e agora di que "calquera pacto que faga terá cousas claras e hai liñas vermellas que se van respectar si ou si", en alusión a este tipo de políticas. En todo caso, o tempo dirá, se tamén, as políticas que din defender agora, non quedan escurecidas pola longa e negra sombra de Vox.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.