Un home acepta ano e medio de prisión por abusar sexualmente dunha coidadora

O Penal 2 de Ourense acolleu este mércores o xuízo contra un home acusado de abusar sexualmente dunha muller traballadora do servizo de axuda a domicilio. Os feitos polos que foi acusado sucederon en datas non determinadas, pero comprendidas entre xullo de 2019 e agosto de 2021 cando o inculpado visitaba ao seu pai, a quen coidaba a vítima.

Segundo recolle o escrito fiscal, o procesado "buscaba a súa proximidade" e convidouna a saír e comer e en varias ocasións, pero "de maneira sorpresiva", aproveitando que estaba a atender ao seu pai, un ancián de 90 anos, "tocoulle os peitos, as nádegas, o cu, sen o seu consentimento", baixo o pretexto de que "estaba namorado" dela.

Ante as advertencias da muller, que puxo os feitos en coñecemento da entidade para a que traballa, e dos servizos sociais municipais, proferiulle expresións tales como: "Vas ser para min, non vas ser para ninguén. Se che vexo con outro córtote de arriba abaixo".

Dito comportamento, segundo o escrito, provocou que a muller abandonase o seu traballo no devandito domicilio. O procesado enfrontábase a unha pena de tres anos de cárcere por un delito continuado de abuso sexual, así como a 15 meses de prisión por un delito de ameazas.

Con todo, as partes chegaron a un acordo de conformidade polo que o acusado recoñeceu os feitos e aceptou un ano e seis meses de prisión polos abusos sexuais, unha condena privativa que queda suspendida desde hoxe mesmo se non volve delinquir en dous anos.

Ademais aceptou un mes a cinco euros o día por un delito leve de ameazas e terá que facer fronte a 1.300 euros por danos morais a razón de 100 euros ao mes durante 13 meses. Tamén se lle impuxeron as costas procesuais.