Noriega deixará de ser alcalde de Teo durante a campaña
O candidato de Compostela Aberta destinará o seu salario dos 15 días de campaña a actividades veciñais. O tenente de Alcalde, candidato de ANOVA, substituirao ao fronte do Concello.
Por Galicia Confidencial | Teo | 11/04/2015 | Actualizada ás 15:57
O alcalde de Teo delegará o seu cargo durante a campaña electoral, na que concurrirá como candidato á alcaldía de Santiago. Nesas dúas semanas -entre o 8 e o 25 de maio- Martiño Noriega cederá as responsabilidades ao tenente de alcalde, Rafael Sisto.
Sisto é o candidato de Sondeteo, a marca de ANOVA para este municipio que se presentou esta semana. Noriega encabeza na capital a lista de Compostela Aberta, a 'marea' na que colabora ANOVA, EU, militantes de Podemos e outras formacións.
Con este movemento Noriega responde as críticas da oposición. En particular, da súa antiga formación, o BNG, que pediu reiteradamente que renunciara ao seu salario -uns 2.200 euros ao mes- por ser alcaldábel noutro municipio.
O PSdeG, que só ten un concelleiro en Teo, reclamou directamente a súa dimisión e acusou ao número dous de ANOVA de usar Teo como plataforma de lanzamento para Santiago, e Compostela como eventual plataforma dun salto a unha candidatura á Xunta.
Na resolución asinada onte, Noriega acorda que o seu salario durante esas dúas semanas sexa destinado a "actividades de dinamización veciñal". O político nacionalista pode revogar en calquera intre esta decisión, pois así llo permite a Lei que regula o funcionamento dos concellos.
