Os Airbnb do Camiño de Santiago triunfan e aumentan os seus ingresos un 45% nun só ano
A tarifa media diaria dun aloxamento nestas rutas en 2002 foi de 106 euros
Por Europa Press / Redacción | Santiago de Compostela | 18/07/2023 | Actualizada ás 16:20
Os anfitrións en Airbnb nos pobos das rutas do Camiño de Santiago ingresaron 19,2 millóns de euros en 2022, un 45% máis que o ano anterior, segundo un comunicado da plataforma. Estes anfitrións en localidades do oito rutas principais do Camiño en España e Portugal acolleron a máis de 165.000 viaxeiros, o que supón un 50% máis que en 2021.
Hai máis de 6.000 aloxamentos activos e case 3.900 anfitrións ao longo de todos os pobos da peregrinación en ambos os países. As rutas máis populares pasan polos pobos situados no Camiño do Norte, Camiño Portugués pola Costa e Central e a Vía da Prata.
Os pobos máis populares segundo o número de viaxeiros están, por esta orde, nos camiños do Norte (case 48.500 hóspedes), o Portugués pola Costa (43.500), Portugués Central (case 24.600), Vía de Prata (máis de 16.000), Francés (máis de 14.300), Inglés (case 8.200), a Fisterra (máis de 7.700) e o Primitivo (case 2.600).
A tarifa media diaria dun aloxamento nestas rutas en 2002 foi de 106 euros; houbo unha media de catro persoas por viaxe; e case o 80% dos anfitrións tiña aloxamentos enteiros, mentres que o 20% restante ofrecía habitacións.
A directora xeral de Airbnb Mercadotecnia Services, SL, Mónica Casañas, destacou que os anfitrións no Camiño ofrecen opcións alcanzables e que esta peregrinación "recupera a súa popularidade despois da pandemia".
