Por Europa Press / Redacción | SANTIAGO DE COMPOSTELA | 23/07/2023 | Actualizada ás 23:57
A portavoz nacional do BNG, Ana Pontón, ofreceu o voto do BNG para a conformación dun goberno de esquerdas no Estado e evitar o "risco" dunha repetición electoral.
Así mesmo, na primeira valoración co escrutinio practicamente pechado, destacou a subida en número de votos e en porcentaxe, aínda que recoñeceu que non era o resultado que o Bloque buscaba, especialmente na provincia de Pontevedra, onde se quedaron a uns 5.000 apoios de conseguir representación.
Ana Pontón salientou que o Bloque fará no Congreso o comprometido na campaña electoral, é dicir, evitar un goberno "da dereita e ultra dereita machista e anti galega" e, á pregunta dos medios, mostrouse "optimista" porque, segundo dixo, os "números dan".
"Son optimista porque os números dan, porque a cidadanía falou e deixou unha mensaxe na urna", manifestou Pontón, quen apelou a que é o momento da "responsabilidade". Aínda que aclarou que só pode falar polo BNG, apuntou que a "vocación" do BNG é "que poida darse ese goberno alternativo" e responder a esas persoas que "respiran tranquilas e ven afastarse" ese goberno coa extrema dereita. "Temos toda a vontade de colaborar, cumprindo co que dixemos na campaña", salientou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.