O Lugo, para Tino Saqués

Tras un longo proceso de meses, o 49% das accións do CD Lugo en mans das administracións xa teñen dono. A xunta de goberno da Deputación de Lugo adxudicou o paquete de 150.000 títulos ao empresario Tino Saqués, quen ten agora un mes (dende que reciba a notificación da adxudicación) para facer o pago de 1.600.500 euros. A puntuación final do proceso do cconcurso, tras seren analizadas as propostas económicas e os proxectos deportivos, foi de 75 puntos para Frisaqués, a empresa do empresario lucense, fronte aos 56,19 obtenidos pola oferta do empresario luxemburgués, con orixes en Riotorto, Gerard López.

Manuel Martínez, voceiro socialista do Goberno provincial, destacou que a Deputación cumpre co seu obxectivo de non intervir na marcha do club e valorou a venda: “Coido que é un beneficio para o CD Lugo, que volverá recibir as axudas que se lle estaban descontando para pagar estas accións, e en principio é un beneficio para todos, para o Lugo, para a Deputación e para a sociedade lucense”.

O empresario Tino Saqués emitiu un comunicado para expresar a súa “satisfacción” por ser o adxudicatario e pediu unidade á toda a afección polo futuro do CD Lugo. “Foi un proceso longo e duro, pero agora desexo expresar a miña ledicia por poder emprender un proxecto apaixonante e que por fin semella que vaise facer realidade. Agora é o intre de estar unidos e agardar os próximos acontecementos, xa que este é un proceso lento que aínda ten camiño por recorrer”.

O dono de Frisaqués, que xa contaba cun 8% das accións, polo que terá maioría no club, recoñece o gran traballo feito polo actual consello de administración presidido por José Bouso e agarda continuar “coa boa dinámica” que levou o club a Segunda División. “Hai que traballar cos pés no chan, pero dando pasos firmes para que o Club Deportivo Lugo siga medrando deportiva e socialmente”, añade.

Saqués di chegar coa máxima ilusión, pero pide prudencia para acadar que o club sexa “un modelo no que poidan mirarse outras entidades”. Sostén que aínda é “moi cedo para falar do proxecto” no que, apunta, leva traballando dende hai tempo. “Unha vez acceda ao club de xeito definitivo agardo poder comunicar a todo o mundo as liñas mestras deste proxecto que comeza". Saqués remata transmitindo toda a súa "forza" ao equipo (xoga co Racing en Santander ás 21.30 horas) ata final de tempada para acadar os obxectivos marcados, cada vez mái preto.