Luís Zahera, Xurxo Fernándes e o programa Lume na Palleira, galardoados nos Premios Rebulir 2023
Os XII Premios Rebulir da Cultura Galega 2023 anunciaron este xoves os galardoados, que recibirán os seus premios o próximo 16 de decembro en Ramirás.
Por Europa Press / Redacción | OURENSE | 27/07/2023 | Actualizada ás 17:19
Os XII Premios Rebulir da Cultura Galega 2023 anunciaron este xoves os galardoados: o actor Luís Zahera, o cantante Xurxo Fernándes e o programa Lume na Palleira, da Radio Galega.
Segundo comunicou a organización deste premio, esta edición tivo 324 candidaturas nas súas tres categorías: música galega, artes escénicas e homenaxe.
Así mesmo, os organizadores subliñaron que esta iniciativa ten o obxectivo de "recoñecer ás persoas ou colectivos que contribúan á difusión e posta en valor da cultura autóctona nas súas diferentes manifestacións".
O cantante Xurxo Fernándes foi o galardoado na categoría de música galega por "representar a interculturalidad desde o ámbito musical e pór en valor o propio sen deixar de conectar co alleo".
O actor Luís Zahera foi o vencedor na categoría de artes escénicas pola súa "dilatada traxectoria no mundo da interpretación sen renunciar nunca á súa esencia e raíces galegas", sinalou a organización.
Pola súa banda, o programa Lume na Palleira levou o premio na categoría homenaxe por ser "un dos máximos expoñentes da difusión da música tradicional e a cultura de base desde hai máis de 25 anos", subliñaron os organizadores.
Ademais, o acto de entrega destes galardóns será o 16 de decembro, ás 19.00 horas, no marco da Gala Central do FIR 2023, que se celebrará no Complexo Polideportivo do Picouto, no Concello de Ramirás.
