Comeza a gran festa dos viños galegos: o Albariño de Cambados

O conselleiro de Medio Rural, José González, participou este mércores na inauguración da LXXXI Festa do Albariño de Cambados, onde destacou a "calidade e proxección" dos viños galegos en xeral, e dos da denominación de orixe (DO) Rías Baixas en particular. Así, felicitou aos viticultores, adegueiros e responsables do Consello Regulador "por manter o impulso destes viños, ano tras ano".

Para o titular de Medio Rural, esta celebración de Cambados constitúe "un fito esencial para esta zona de produción, converténdose nunha cita de referencia no calendario de festas enoturísticas de Galicia". "Somos o que somos grazas a viños como estes, que pon en valor as nosas variedades autóctonas", apuntou o conselleiro, engadindo que este tipo de festas tamén lle confiren valor, "dándolle aos viños galegos a atención que merecen e dándoos a coñecer".

José González reivindicou a aposta da Xunta polo sector vitivinícola galego. "Desde o Goberno galego queremos consolidar este sector como punta de lanza do agro da nosa comunidade", avanzou. Isto lévase a cabo a través da Estratexia de dinamización económica, territorial e turística das comarcas vitivinícolas de Galicia, "co obxectivo de reforzar todas as dimensións deste sector: económica, territorial, turística, patrimonial e paisaxística".

Ademais, o conselleiro vinculou a iniciativa coa Lei de recuperación da terra agraria de Galicia, que pretende "pór en valor terreos en estado de abandono ou infrautilización, garantindo a posta en marcha de actividade agrogandeira e forestal con valor engadido que á vez que xera riqueza axuda a fixar poboación no rural".

LEI DA CALIDADE ALIMENTARIA

Tamén nesta liña, o conselleiro puxo de relevo a futura Lei de Calidade Alimentaria, que trata de "salvagardar a continuidade do sector primario, de forma que a calidade sexa o gran referente que sempre distingue a Galicia". A maiores, lembrou as diferentes liñas de axuda que xestiona a Xunta para potenciar o sector agroalimentario galego.

Achegas específicas, citou, para o sector do viño, como as destinadas a apoiar os investimentos en elaboración e comercialización de produtos vitivinícolas, ás que se destinaron nos últimos cinco anos máis de 13 millóns de euros para chegar a 172 beneficiarios.

Tamén as axudas para a promoción do viño galego en mercados de terceiros países, que permitiron conceder 128 subvencións desde 2018 por importe de 6,7 millóns de euros. Xa se publicou a convocatoria do ano que vén do orzamento de 1,7 millóns de euros.