O PSdeG dos Blancos denuncia que o responsable do consello escolar é unha persoa condenada por malos tratos
Para os socialistas esta é unha situación "inadmisible", polo que lle esixen aos responsables do PP que "tomen cartas no asunto e aparten definitivamente a Barreiro Jardón dos órganos de goberno".
Por E.P. | SANTIAGO DE COMPOSTELA | 25/08/2023 | Actualizada ás 19:03
O PSdeG dos Blancos denunciou que o alcalde do PP, José Manuel Castro Blanco, mantén como responsable do consello escolar e dentro da comisión de contas a unha persoa condenada por malos tratos.
Segundo denuncian nun comunicado, o alcalde fixo "oídos xordos" ante as voces que pedían que incluíse a José Manuel Barreiro Jardón, número 3 das listas populares nos comicios electorais do pasado mes de maio, nos órganos de goberno municipais, por estar condenado por malos tratos no ámbito doméstico.
Para os socialistas esta é unha situación "inadmisible", polo que lle esixen aos responsables do PP que "tomen cartas no asunto e aparten definitivamente a Barreiro Jardón dos órganos de goberno".
No comunicado, a portavoz do PSdeG nos Blancos, Emilia López Blanco, lembrou que no mes de maio, unha vez xa se coñecía a situación, o líder do PP galego, Alfonso Rueda, comprometeuse a que "non formaría parte do goberno municipal". "Nada do prometido se cumpriu e vemos que finalmente esta persoa está presente en dous órganos de goberno, algo que nos parece inadmisible", defendeu.
Considera López Blanco que o PP "só tentou escurrir o vulto naquel momento para saír do paso de que levaban a un condenado por agresión nas listas con promesas que non cumpriron". Así mesmo, pide a Rueda que actúe "de forma inmediata" e "dea as instrucións pertinentes" para que o alcalde aparte a José Manuel Barreiro Jardón do consello escolar e da comisión de contas.
