O TSXG condena a Hablamos Español a pagar 2.000€ tras insistir en recibir as programacións educativas en castelán
Esta entidade suxire que a sentenza é "disparatada".
Por Galicia Confidencial | A Coruña | 08/09/2023 | Actualizada ás 14:02
A organización de defensa do castelán Hablamos Español ten que pagar 2.000 euros, 1.500 euros á Comisión de Transparencia de Galicia e 500 á Consellería de Educación, logo de que o Tribunal Superior de Xustiza de Galicia rexeitara o seu recurso para que esta consellería traducira ao castelán as programacións educativas.
"Négannos as programacións didácticas en español, o Tribunal Superior de Xustiza de Galicia (TSJG) dálles a razón e encima, impóñennos as costas", di nun comunicado a entidade que dirixe Gloria Lago, ex presidenta de Galicia Bilingüe.
A Comisión de Transparencia alega que é abusivo pedir as programacións didácticas en castelán, porque só as teñen en galego, terían que traducilas e son moitas. "En Galicia prohiben aos profesores redactalas en español, así que non nolas dan e encima cóbrannos", insiste a entidade.
"O TSXG dá por boa esta disparatada interpretación dunha norma, que supón baleirar de contido o dereito que di recoñecer. Confunden o concepto información coa lingua na que se expresa. E encima impóñennos as costas segundo a minuta achegada polo avogado da Administración (que está en persoal)", critican.
"Hablamos Español propúxolle á consellería que nos desen 50 programacións didácticas en español e que nos enviasen o resto de forma gradual. Pedímolas en formato dixital. En definitiva, démoslles todo tipo de facilidades. Pero negáronse. O motivo é que de ningunha maneira queren que eses documentos estean en español", conclúen nun comunicado.
