A oposición critica á Xunta polo seu modelo impositivo que "beneficia aos ricos" e "ignora" as rendas baixas
O conselleiro de Facenda, Miguel Corgos, sinalou que "rebaixas" como as impostas para o tramo autonómico do IRPF serán "consolidadas" nos orzamentos do próximo ano, que están en fase de elaboración.
Por E.P. | SANTIAGO DE COMPOSTELA | 27/09/2023 | Actualizada ás 14:26
O conselleiro de Facenda e Administración Pública, Miguel Corgos, avanzou que os orzamentos da Xunta para 20024 "consolidarán" as rebaixas fiscais que están "en vigor" na actualidade, como a diminución ao 50% do imposto de patrimonio para as rendas máis altas.
A política fiscal do Goberno galego centrou as dúas interpelacións que levaron ao pleno do Parlamento autonómico este mércores as deputadas da oposición Noa Presas (BNG) e Begoña Rodríguez Rumbo (PSdeG).
Ambas mostráronse críticas coa forma de xestionar as tributacións que dependen da Administración autonómica por parte dos gobernos do Partido Popular, que ven enfocadas a "favorecer" ás rendas máis altas mentres "crece o número de galegos" con dificultades para chegar a fin de mes.
Para Presas, que enfocou a súa interpelación na "ausencia" de medidas por parte da Xunta para apoiar aos galegos que máis padecen o contexto inflacionista, o Executivo autonómico é "insolidario" e "inxusto" porque favorece "a quen máis ten", ademais de ser "incapaz" de anticiparse aos problemas.
Pola súa banda, Rodríguez Rumbo cualificou de "mercadotecnia fiscal" a política impositiva dos gobernos primeiro presididos por Alberto Núñez Feijóo e agora polo seu sucesor Alfonso Rueda, ao que acusou de facer "agasallos" a quen "non o necesita", en alusión á rebaixa do 50% no imposto de patrimonio.
Na súa resposta, Corgos sinalou que esta e outras "rebaixas" como as impostas para o tramo autonómico do IRPF serán "consolidadas" nos orzamentos do próximo ano, que se atopan en fase de elaboración.
Neste sentido, incidiu en que o Executivo do que forma parte "continuará" na senda de "baixar os impostos todo o que se poida sen que afecte o estado de benestar", como, di, perseguían medidas como a deflactación con carácter retroactivo a 1 de xaneiro de 2022 do tres primeiros tramos do IRPF.
Corgos remarcou que as rebaixas fiscais da Xunta permitiron na última campaña da Renda que cada galego "se aforrase 476 euros" en comparación ao que pagaba en 2009, á vez que subliñou a dedución de 250 euros para contribuíntes con dous fillos para equiparalos ás familias numerosas, mentres que para estas ampliouse a dedución ata os 500 euros.
