Os deputados galegos do PP preguntan ao Goberno se os trens Avril chegarán en novembro, cumprindo os prazos

Os deputados do PPdeG no Congreso dos Deputados presentaron senllas preguntas na Cámara Baixa co fin de que o Goberno central "aclare cales son as medidas urxentes e efectivas" que ten previsto adoptar para "solucionar as recorrentes deficiencias e atrasos" na prestación do servizo ferroviario de media distancia en Galicia.

Así mesmo, reclama que confirme se "cumprirá o prazo de entrega dos trens Avril" en novembro de 2023, para así garantir a chegada da alta velocidade ás cidades galegas. Como explican nun comunicado, os populares lamentan que, coa volta ao curso, persistan en Galicia os "atrasos de trens de media distancia que periodicamente denuncian os usuarios" deste servizo no Eixo Atlántico, así como tamén no Avant Ourense-Santiago-A Coruña.

Estas deficiencias están derivadas, entre outras razóns, "por fallos da infraestrutura, limitacións temporais de velocidade, problemas de diferente índole nas estacións ou fallos mecánicos nos trens". "Incidencias que non son puntuais nin esporádicas, converténdose en frecuentes e ás veces, ata podería aventurarse, que se trata de atrasos programados e as limitacións de velocidade, permanentes", denuncian os deputados galegos do PP.

Esta petición coincide con que, en apenas uns días, a conselleira de Infraestruturas, Ethel Vázquez, se vaia a reunir (o día 4 de outubro) coa Secretaría de Estado de Transportes e, tal e como confirmou no Parlamento de Galicia este mércores, reclamará nela un "calendario certo" sobre a implantación total da alta velocidade, entre outras cuestións.

Deputados elixidos polas circunscricións galegas no Congreso dos Deputados | Fonte: DIEGO PORTA - PP