Sanmartín espera que a taxa turística, que cre que Rueda "entende perfectamente", sexa "unha realidade" nos próximos meses

A alcaldesa de Santiago, Goretti Sanmartín, sinalou este martes que espera que a taxa turística, que cre que o presidente da Xunta "entende perfectamente", sexa "unha realidade" nos próximos meses. A preguntas dos medios sobre se Alfonso Rueda falara de "turismofobia no Concello de Santiago" no encontro mantido entre ambos este luns, Sanmartín asegurou que "para nada".

"Nós estamos a favor de que haxa turistas, pero queremos que haxa unha serie de gastos que poidan ser sufragados por aquelas persoas que chegan a Santiago. É algo que está en numerosas cidades do mundo, nas que non hai ningún problema e que el entende perfectamente. Creo que está máis que xustificado que poida haber unha taxa turística para Santiago", defendeu.

Así mesmo, Sanmartín detallou que "a maior parte" do diñeiro recadado con esta taxa, excepto "os gastos de xestión e de tramitación", irá destinado a cuestións relacionadas coa "desestacionalización, co turismo de calidade" e, "sobre todo", co "sobrecusto que ten o turismo para os veciños de Compostela".

"Entendemos que iso é factible de facer e de lograr. O que nos pomos é agora a traballar en ter todos os datos e poder envialos canto antes", sinalou. Nese sentido, Sanmartín insistiu en que "non vai haber ningún problema" en relación coa reinversión desa taxa e remarcou que "a vontade", tanto do presidente do Goberno galego como do Concello, é que "o imposto de estancias turísticas poida ser unha realidade nos próximos meses".

CONSULADO DE CUBA EN SANTIAGO

A alcaldesa de Santiago, Goretti Sanmartín, recibiu este martes no Concello á consulesa de Cuba na capital galega, Ingrid Izquierdo, coa que acordou pór en marcha "actividades culturais en común" para reivindicar "os lazos de unión que unen Cuba co pobo galego".

Un dos asuntos que abordaron foi a posibilidade de utilizar espazos e locais municipais para que a comunidade cubana ou o propio consulado poidan realizar as súas actividades. Así, Sanmartín explicou que puxeron a disposición do Consulado os centros socioculturais do Concello para que poidan celebrar as súas actividades.

Ademais, a rexedora compostelá lembrou que a capital galega é "especialmente sensible e solidaria co pobo cubano", xa que en distintas ocasións "manifestou a súa posición desa solidariedade", así como "o irmandamento coa cidade de Santiago de Cuba desde 1995".

"Retomar eses lazos, volver establecer vínculos de unión, de solidariedade e de intercambio cultural son algunhas das cuestións que anotamos, así como, na medida do posible, buscar vías de cooperación co pobo cubano", resumiu.

Pola súa banda, Ingrid Izquierdo agradeceu esta colaboración cultural para, entre outras cousas, "realizar exposicións ou intercambios culturais con artistas". Tamén destacou a idea de retomar o intercambio cultural entre "ambos os pobos" que, segundo reivindicou, "foi tan positivo e tan boa marca deixou" tras o irmandamento entre Santiago de Cuba e Santiago de Compostela en 1995.