Jaione Camborda tras gañar a Cuncha de Ouro con 'O Corno': "É un triunfo para a lingua galega, para que se normalice"
A cineasta, que estreou este martes en Galicia 'O Corno' como película inaugural do festival Curtocircuito (con cheo absoluto no Auditorio de Galicia), recoñece estar "moi nerviosa" ao ver "tantas caras coñecidas". "Púxenme máis nerviosa case que no propio festival de San Sebastián", dixo.
Por Europa Press / Redacción | SANTIAGO DE COMPOSTELA | 04/10/2023 | Actualizada ás 13:44
A cineasta Jaione Camborda (San Sebastián, 1983) reivindicou a Cuncha de Ouro conseguida o fin de semana pasada no Festival de San Sebastián con 'O Corno', filme en galego, "como un triunfo tamén para a lingua, para que se normalice". A directora vasca (afincada na capital galega desde hai 15 anos) foi recibida este mércores pola alcaldesa de Santiago, Goretti Sanmartín, no Pazo de Raxoi.
Alí, asinou no libro de honra e recibiu de mans da alcaldesa unha acuarela pintada a man e unha figura de 'As Marías', "símbolo de Santiago". "Nada me fai máis feliz que estar hoxe aquí, na cidade na que escollín vivir. Escollina porque é cultural, viva, vándala e chea de bos faladoiros. Porque os que facemos cultura e gozamos dela, necesitamos da calor de teatros, cinemas, museos, concertos e demais. Porque nos fai máis libres e axúdanos a entender esta nebulosa que é a vida", escribiu.
"Traelo a Santiago é especial, tamén sentir como a xente o sente como seu. É un triunfo tamén para a lingua, para que se normalice. Todo o que sexa avanzar é motivo de celebración", sinalou. Camborda, a primeira directora española en facerse coa Cuncha de Ouro cunha película en galego, nunca "imaxinou" conseguir o galardón. "Para nada o esperaba. Un faino porque quere que se vexa o filme, tenta ser ambicioso, chegar todo o máis alto, dar esa visibilidade que necesita o filme, pero a verdade é que a Cuncha de Ouro era pensar moi alto", comenta.
A cineasta, que estreou este martes en Galicia 'O Corno' como película inaugural do festival Curtocircuito (con cheo absoluto no Auditorio de Galicia), recoñece estar "moi nerviosa" ao ver "tantas caras coñecidas". "Púxenme máis nerviosa case que no propio festival de San Sebastián", dixo.
"ROMPER BARREIRAS"
Como primeira directora española en gañar o certame internacional cunha cinta nun idioma cooficial, considera que "romper barreiras está ben sempre que sexa a primeira". "Hai traballo por facer, esperemos que algún día non sexa noticia e podamos estar nese momento en que estea normalizado, pero aínda hai que facer cousas", remarcou.
Con todo, reivindicou que as cineastas tamén teñen ganas "de falar de cinema, máis aló do xénero". "Pero iso ten que chegar no momento en que non se teña que falar diso. É necesario aínda", concedeu. Jaione Camborda tamén defendeu o momento "boísimo" que vive a industria do cinema en Galicia, "cunha xeración, unha comunidade de cineastas que fai un cinema moi comprometido, co propio cinema e coa vida, e tamén co amor". "E iso está a dar uns froitos internacionais moi destacables. Estamos de celebración. Sempre se pode mellorar, pero hai unha xeración moi destacable", reivindicou.
