Jácome e Rueda chancean facendo "cábalas" sobre cando serán as autonómicas: "Ou en decembro ou en xuño"
O alcalde de Ourense non lle desvelou ao presidente da Xunta se o seu partido, Democracia Ourensana, se presentará.
Por Europa Press / Redacción | OURENSE | 04/10/2023 | Actualizada ás 20:15
O presidente da Xunta, Alfonso Rueda, e o alcalde de Ourense, Gonzalo Pérez Jácome, trataron este mércores, no seu encontro institucional, a próxima celebración das eleccións autonómicas e as "cábalas" da súa posible data. Preguntados polos medios de comunicación tras o seu encontro, ambos recoñeceron que falaron das eleccións autonómicas, aínda que non en profundidade.
Así, Alfonso Rueda trasladou que foi Pérez Jácome "quen sacou o tema", no que o viu "moi interesado" e apuntou que o alcalde lle indicou as datas que cre posibles para a convocatoria. "Díxome que serán en decembro ou en xuño", dixo Rueda entre risas, "ou as farei moi temperán ou moi tarde, eses foron os seus prognósticos".
Pola súa banda, Pérez Jácome explicou que "non é un tema nin institucional nin de traballo", pero que si lle deu as súas "cábalas das datas", aínda que non lle revelou se se presentará ás eleccións. Nas últimas autonómicas, o partido de Gonzalo Pérez Jácome, Democracia Ourensana, non se presentou a pesar de que o levaba facendo desde o ano 2009. O motivo nesa ocasión foi un pacto de goberno co PP, grazas ao que asumía a alcaldía das Burgas.
Con todo, pouco tempo despois, no verán do 2020, unha denuncia do seu grupo de goberno cara ao seu propio partido, Democracia Ourensana, facía que quedase con tan só tres concelleiros da súa formación e que o Partido Popular, pouco máis tarde, abandonase o cogoberno. En 2021, DO emitía un comunicado no que admitían que o feito de non presentarse a eses comicios debíase a que "existía un pacto" co PP, pero lamentaban que fora "dinamitado".
Nese comunicado trasladaban que se presentarían ás próximas eleccións xerais, emulando a Teruel Existe, unha idea que se descartou este pasado mes de xuño noutro comunicado, no que a formación sinalaba que, do mesmo xeito que xa sucedeu en convocatorias nacionais anteriores, deixarían pasar de longo os comicios.
Agora, respecto diso das eleccións autonómicas aínda non adiantou se se presentará tendo en conta que xa non existe ese pacto co Partido Popular, posto que mantén a alcaldía en solitario con 10 edís de Democracia Ourensana, fronte aos 7 do Partido Popular, 6 do Partido Socialista e 4 do BNG.
