A 'Operación karaoke' remata coa desarticulación dunha banda que vendía droga en pubs de Pontevedra
Por Europa Press / Redacción | PONTEVEDRA | 16/10/2023 | Actualizada ás 16:36
A Policía Nacional e a Policía Local de Pontevedra desarticularon un grupo criminal dedicado á venda de estupefacientes na cidade, nun operativo conxunto bautizado como 'Operación Karaoke', que se saldou con catro detidos.
Segundo informaron fontes policiais, as pescudas comezaron a finais do pasado verán, por mor de ter coñecemento a Udyco da existencia de varios puntos de venda polo miúdo de droga, en varios locais da zona monumental de Pontevedra. Ditos locais eran rexentados polo considerado 'xefe' do grupo.
Ao longo dos meses, despregáronse diferentes operativos de vixilancia, coordinados coa Policía Local, e púidose identificar o suposto responsable deste grupo delituoso, do que tamén formaban parte outro tres persoas, con diferentes roles adxudicados. Así, a Policía puido comprobar que levaba a cabo a venda de cocaína, haxix e marihuana, tanto no domicilio do xefe do grupo como en dous locais da zona monumental da cidade.
Unha vez autorizados os rexistros polo xulgado, levaron a cabo as detencións, o pasado 5 de outubro. Neses rexistros, os axentes incautáronse de 520 gramos de haxix, varias doses de cocaína preparadas para a venda, 24.000 euros en efectivo, básculas de precisión e outros efectos para a preparación da droga.
