O alcalde de Vilagarcía non aclara se seguirá presidindo a Fegamp: "Será a dirección do PSdeG quen decida"
Alberto Varela manifestou que "todo ten os seus tempos" e que, nestes momentos, a dirección da federación municipalista está centrada en "pelexar" polos intereses das entidades locais.
Por E.P. | SANTIAGO DE COMPOSTELA | 17/10/2023 | Actualizada ás 15:56
O alcalde de Vilagarcía de Arousa, Alberto Varela, evitou pronunciarse sobre se desexa continuar á fronte da Federación Galega de Municipios e Provincias (Fegamp), que celebrará a súa asemblea xeral a mediados de novembro.
Preguntado sobre se a súa intención é seguir catro anos máis á cabeza da entidade que representa aos 313 concellos e o catro deputacións, Varela apuntou que será a dirección do seu partido, o PSdeG, a que "decida quen teña que estar á fronte da Fegamp" no próximo mandato.
O rexedor vilagarcián manifestou que "todo ten os seus tempos" e que, nestes momentos, a dirección da federación municipalista está centrada en "pelexar" polos intereses das entidades locais.
"Estamos aquí representados diferentes alcaldes de diferentes formacións políticas. Cada un decidirá. No meu caso, vai ser a dirección de PSdeG a que decida quen teña que estar á fronte de Fegamp", sinalou Varela.
