Por Europa Press / Redacción | SANTIAGO DE COMPOSTELA | 23/10/2023 | Actualizada ás 12:26
O delegado do Goberno, Pedro Blanco, asegura que "se están cumprindo os prazos" para terminar na data comprometida, xullo de 2024, o novo edificio de viaxeiros da estación intermodal de Santiago. En declaracións á prensa con motivo dunha visita ás obras este luns, Blanco destacou que "se está traballando arreo" para "recuperar o tempo perdido durante moitos anos" nos que a intermodalidade estivo "nos caixóns" con outros gobernos en Madrid.
Pedro Blanco subliña que se avanza para que Santiago sexa o primeiro concello de Galicia que incorpora a intermodalidade. Ademais, di que tamén está "orgulloso" como santiagués. Aínda que recoñece que é unha obra "complicada", "difícil", debido a que se mantén o tráfico ferroviario durante a execución, espera que se poña en marcha "antes que despois".
VALORACIÓN DA ALCALDESA
Pola súa banda, a alcaldesa de Santiago, Goretti Sanmartín, valora que se van "cumprindo prazos" para que "ao redor de xullo" do ano que vén estea lista a construción do edificio levantado de nova planta no espazo existente entre a antiga estación e a terminal de bus.
A rexedora espera que se cumpra co acordo alcanzado en pleno municipal, "por unanimidade", para que a intermodal se demonine de forma oficial Daniel Castelao. Tamén resalta que esta é unha obra "moi importante" para o conxunto da poboación de Compostela, pois "non será sen tempo" que poida contar cunha intermodal.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.