Sindicatos do naval reclaman información sobre accidentes mortais no sector, tres desde 2020
Tamén alertaron na Mesa do Naval sobre a precariedade nas condicións de traballo debido ao actual modelo de estaleiros de sínteses.
Por Europa Press / Redacción | VIGO | 25/10/2023 | Actualizada ás 20:03
Os sindicatos reclamaron este mércores máis información sobre os accidentes mortais no sector de construción e reparación naval, e alertaron sobre a precariedade nas condicións de traballo debido ao actual modelo de estaleiros de síntese. Así o trasladaron na reunión da Mesa do Naval, na que tamén participaron representantes das empresas, da Xunta, e da Inspección de Traballo.
Segundo explicaron fontes sindicais, neste encontro, "que chega 13 anos despois da última Mesa do Naval", púxose sobre a mesa a necesidade de que tanto a Xunta como a parte empresarial "empecen a tomarse en serio a situación do sector", especialmente despois de que tres traballadores perdesen a vida desde 2020.
En primeiro lugar, destacaron a necesidade de "coñecer" este sector, polo que pediron que se elabore un informe DAFO (debilidades, ameazas, fortalezas e oportunidades) no que se aborden cuestións como a "atomización" de empresas auxiliares; a "mínima estrutura", tanto destas como dos propios estaleiros; o modelo de negocio, que "non encaixa no futuro"; as dificultades de coordinación de actividades; a "mínima ou nula" evolución tecnolóxica; ou a análise de tarefas, horarios e tempos de descanso.
En canto ás propostas, os sindicatos expuxeron, entre outras medidas, que se cre un Observatorio Galego do Metal/Naval, que leve a cabo campañas de atracción de profesionais "potenciando a estabilidade e as condicións" de traballo, ou que se mellore a formación, tanto en actividade como en prevención de riscos.
Por outra banda, reclamaron coñecer os resultados das investigacións dos accidentes laborais con resultado de morte, e valoraron que a Inspección de Traballo non descarte investigar nun futuro tamén os accidentes que se consideren leves. A Xunta, mentres, trasladou que estudará a posibilidade de crear un Plan Director para o Naval, e Asime realizará un estudo sobre os CNAE, os códigos de clasificación de actividades económicas, que se aplican ás diferentes empresas da industria auxiliar.
