Convocan folga na empresa de fabricación de tecidos 'screen' Vertifil, en Moraña

O comité de empresa de Vertifil convocou folga para este mércores, 8 de novembro, nesta compañía de Moraña en contra de despedimentos e para reclamar melloras laborais. O paro afecta a todo o persoal do centro entre as 5.00 e as 7.00 horas, así como de 13.00 a 15.00 horas. A representación sindical chama aos 69 traballadores da empresa a secundar a folga, unha medida á que se chega "tras os intentos de negociar coa dirección a paralización das rescisións de contrato, contra as que se realizaron xa varias mobilizacións e presentáronse demandas xudiciais".

Nun comunicado, o comité reclama que: respéctense os cocientes de persoal por seccións, adecúense as categorías profesionais, fréese o aumento inxustificado dos ritmos e das cargas de traballo e adáptense os salarios á actividade e o desenvolvemento profesional na empresa. "Pero a empresa só nos dá longas ou o silencio por resposta, polo que entendemos que non ten intención de chegar a ningún acordo nestas materias", reproba. Vertifil leva a cabo todo o proceso produtivo destinado á fabricación de tecidos 'screen' para a protección solar no sector de compañías téxtiles de confección de cortinas, toldos, tapicería, hamacas e mobiliario exterior.

A empresa de Moraña realiza o proceso produtivo de fabricación de tecidos que lle encarga a compañía do seu grupo empresarial Vertisol Internacional SA, con sede en Granollers (Barcelona), para a súa venda ao seu cliente final. O principal cliente ao que Vertisol vende os tecidos fabricados é Bandalux Industrial, que antigamente formaba parte do mesmo grupo empresarial familiar e que ten tamén unha planta en Moraña, na que Vertifil entrega gran parte da produción por encargo de Vertisol, explica o comité de empresa.

Interior da empresa Vertifil en Moraña | Fonte: Arquivo