Ethel Vázquez non entende as críticas de BNG e PSdeG ao acordo do Hospital Clínico e convida a "reflexionar"

A conselleira de Infraestruturas e Mobilidade, Ethel Vázquez, mostrouse sorprendida polas críticas do PSdeG e BNG ao acordo ofrecido pola Xunta de Galicia ao Concello de Santiago para remodelar o Hospital Clínico, "igual" aos dos hospitais da Coruña e Pontevedra, acordos que esas forzas "bendicen e subscriben".

A responsable de Infraestruturas defendeu este luns, tras visitar o avance das obras da 1ª fase do complexo administrativo Cidade de San Caetano, que a Xunta propuxo un acordo "integral" para a modernización e a transformación de todo o ámbito do hospital de Santiago, "non soamente a ampliación do propio equipamento, senón zonas verdes, aparcadoiro, etc.".

Considera Ethel que, igual que o Concello de Santiago implicouse na estación intermodal, tamén é a súa "deber" implicarse na modernización e ampliación do hospital clínico de Santiago porque é un proxecto estratéxico". 

"Agora mesmo está claro que a pelota está no tellado do Concello de Santiago (...), pero insisto, sorpréndeme enormemente que dous partidos, BNG e PSdeG, critiquen algo que os mesmos partidos vendicen e subscriben no resto das cidades", remarcou.

Neste sentido, apelou ao que considera o "deber" das administracións: "chegar a acordos", polo que convida o Concello a "reflexionar" e estudar os proxectos da Coruña e Pontevedra, "para que se dean conta de que son propostas de colaboración iguais e que supuxeron o cambio definitivo para poder implantalos, dous exemplos de éxito que teñen que supor un reflexo para que sexa tamén un éxito no acordo en Santiago".