Por E.P. | A Coruña | 13/11/2023 | Actualizada ás 17:46
O goberno provincial da Coruña fixa como obxectivos do seu mandato en 2024 a protección social e xerar riqueza a través dun orzamento que ascenderá a uns 222 millóns de euros, segundo informou o presidente provincial, Valentín González Formoso. Será un orzamento un 7,2% superior ao do actual exercicio.
Así o explicou nunha comparecencia xunto ao vicepresidente provincial Xosé Regueira e o deputado de Facenda, José Ramón Rioboo, nunha comparecencia na institución provincial. Entre outras cuestións, Formoso destacou a execución de actuacións a través de programas como o Plan Único de Obras e Servizos ou o Plan de Emprego Local.
Tamén resaltou o incremento do orzamento en áreas como a cultura, o emprego, a protección social ou as vinculadas ao ámbito da produción dixital. Ademais, resaltou o orzamento de oito millóns de euros para a área de mar e agro, así como as actividades vinculadas a promocionar o turismo da provincia.
Pola súa banda, Xosé Regueira subliñou que se trata dun documento "importante para os concellos, sobre todo os de menor tamaño", en alusión aos investimentos que destina aos mesmos a institución provincial. En canto á súa aprobación, Rioboo explicou que será en pleno, unha vez que leven á comisión informativa, co obxectivo de que se aproben antes de que acabe o ano.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.